QR Ekologııa, geologııa jáne tabıǵı resýrstar mınıstrligi Qostanaı oblysy Jitiqara aýdanynyń Jelkýar ózenindegi balyqtardyń qyrylýyna qatysty túsinik berdi, dep habarlaıdy Egemen.kz.
Vedomstvonyń baspasóz qyzmeti taratqan málimetke súıensek, 2021 jylǵy 6 jeltoqsanda Tobyl-Torǵaı oblysaralyq basseındik balyq sharýashylyǵy ınspeksııasyna Qostanaı oblysy Jitiqara aýdanynyń Jelqýar ózeninde balyqtardyń qyrylýy týraly aqparat túsken. Atalǵan jerge birqatar quzyrly mekemeniń mamandary barǵan.
«Nátıjesinde ortasha salmaǵy 17-den 25 grammǵa deıingi «torta» túrindegi balyqtardyń qyrylý faktisi anyqtaldy, ólgen balyqtyń jalpy kólemi 280 kg. Ekologııa departamenti men «Balyq sharýashylyǵy ǵylymı-óndiristik ortalyǵy» JShS Soltústik fılıalynyń mamandary zerthanalyq zertteýler júrgizý úshin sý synamalary men balyq ushalaryn aldy. О́lgen balyqtar jınalyp, kádege jaratý úshin «Qostanaı oblysy Jitiqara aýdanynyń veterınarııalyq stansııasy» KMK-ǵa berildi», delingen mınıstrlik habarlamasynda.
Málim etilgendeı, tiri qalǵan balyqty saqtaý jáne odan ári qyrylýǵa jol bermeý maqsatynda Tobyl-Torǵaı oblysaralyq basseındik balyq sharýashylyǵy ınspeksııasynyń mamandary Jitiqara aýdany Zabelovka kentiniń ákimdigimen birlesip, melıorasııalyq jumystar (sý aıdynyn aerasııalaý, shuńqyrlardy burǵylaý jáne maınalardy kesý) uıymdastyrǵan.
«Osy ýchaskedegi balyqtyń tyǵyzdyǵyn azaıtý úshin jaqyn mańdaǵy Jelqýar sý qoımasyna balyqtardyń bir bóligin kóshirý boıynsha jumystar júrgizilýde. Búgingi tańda ınspeksııa, aýyl ákimdigi jáne «Vystrel» JShS shamamen 500 kg balyqty qutqarýdy júzege asyrdy.
Qutqarý jumystary jalǵasýda. Balyqtardyń qyrylýynyń aldyn ala sebebi – 1,5 ga ýchaskedegi balyq resýrstarynyń tolyp ketýine baılanysty sýdaǵy otteginiń bolmaýy. Zerthanalyq zertteýlerdiń nátıjeleri týraly aqparat qosymsha habarlanatyn bolady», dedi mınıstrliktiń baspasóz qyzmetinen.