Ulystyń Uly kúni Naýryz merekesi qarsańynda Qazaqstan Respýblıkasynyń Prezıdenti Qasym-Jomart Toqaevtyń «Jańa Qazaqstan: jańarý men jańǵyrý joly» atty Joldaýy jarııalandy. Jyldyń basty qujatynda Semeı aımaǵynda Abaı oblysyn qurý qajettigi aıtyldy. Jańalyqty óńir turǵyndary úlken qýanyshpen qabyl aldy.
Memleket basshysy: «Memleketimizdiń órkendeýi aımaqtardyń qýatty bolýyna tikeleı baılanysty» deı kelip, «Eń aldymen, Semeı aımaǵynda Abaı oblysyn qurýdy usynamyn. Semeı qalasy jańa oblystyń ortalyǵy bolady. Osy máseleni aımaq turǵyndary kópten beri aıtyp júrgenin bilemin. Qazir ol jaqta sheshimin tappaǵan túıtkilder az emes. Mysaly, aımaqtyń ishki ınfraqurylymy ábden tozǵan. Kezinde Alash arystarynyń basyn qosqan Semeı qalasynyń jaǵdaıy da máz emes. Biz tarıhı ádildikti ornatyp, ulylarymyz dúnıege kelgen kıeli ólkeni qaıta jańǵyrtýǵa tıispiz» degen bolatyn.
Bul oblys mártebesinen aırylǵan sońǵy shırek ǵasyr ýaqyttan beri qaraı biraz eńsesi túsip ketken Semeı qalasy damıdy, jumys oryndary ashylady, halyqtyń ál-aýqaty jaqsarady degen úmitimizdi oıatqan aıtýly jańalyq bolǵany ras. Semeı qalasy oblys ortalyǵy bolsa, О́skemennen shalǵaı jatqan aýdandardyń turǵyndary úshin ońtaıly bolady dep oılaımyn.
Qańtar aıynan bastap orman salasy mamandarynyń jalaqysynyń óskeni de Úkimettiń bizdiń jaǵdaıymyzǵa beı-jaı qaramaıtyndyǵyn kórsetedi.
21 naýryz Halyqaralyq orman kúni ekeni málim. Shaǵyn ormandy memleketter qataryna jatatyn Qazaqstan úshin orman qoryn saqtap, molaıtýdyń mańyzy zor. Prezıdent tapsyrmasymen 2021-2025 jyldar aralyǵynda orman jamylǵysynyń kólemin ulǵaıtý mindeti júktelip otyr. Bul rette «Semeı ormany» memlekettik orman tabıǵı rezervaty ujymynyń da atqaryp jatqan jumystary az emes. 2021 jyly aǵash otyrǵyzý jumystaryn sapaly oryndaý maqsatynda, sonymen qatar, orman ekpelerine mehanıkalandyrylǵan kútim jasaý úshin qajetti birtalaı zamanaýı tehnıkalardyń satyp alynǵandyǵy da osy baǵyttaǵy jumystardyń bir parasy. Bul jumystar toqtamaq emes.
Nursulý QASENOVA,
«Semeı ormany» MOTR» RMM
Bókebaı fılıalynyń orman sharýashylyǵy ınjeneri