Memleket basshysynyń atyna Lıvan Parlamenti «Mýstakbal» partııasy parlamenttik blogynyń kóshbasshysy, eks-Premer-mınıstr Fýad Sınıoradan hat keldi, dep habarlady Prezıdenttiń baspasóz qyzmeti.
Avtor óziniń hatynda Memleket basshysynyń Qazaqstan halqyna bıylǵy Joldaýymen zor qyzyǵýshylyq bildire otyryp tanysyp shyqqanyn, onda eldiń bolashaǵy kórinis tapqanyn jáne basty maqsatqa – Qazaqstannyń 2050 jylǵa deıin álemdegi eń damyǵan 30 eldiń qataryna qosylýǵa qol jetkizý joldary aıqyndalǵanyn aıtady.
F.Sınıora Joldaýda atalǵan damý baǵyttarynyń arab jáne musylman álemi úshin erekshe máni bar ekenin atap ótken.
«Siz bizdiń ıslam álemindegi talqylaýlarymyzda aıtyla bermeıtin asa mańyzdy taqyryp – ósim, jańǵyrtý jáne ekonomıkalyq damýdyń mańyzdy ári tıimdi biriktirýshilik qaǵıdattar bolyp sanalatyny týraly aıttyńyz», delingen hatta.
Avtor Qazaqstannyń damý jolynda alǵa qoıǵan maqsattarǵa qaraı qadam basa otyryp, ózge musylman jáne arab elderi úshin úlgi bolatynyna senim bildirip, hat sońynda Nursultan Nazarbaevqa zor densaýlyq jáne barlyq oıǵa alǵan josparlaryn iske asyrý jolynda tabandylyq tilegen.