Bıbigúl Tólegenova «Dostastyq juldyzy» syılyǵyn aldy

KSRO halyq ártisi, kúmis kómeı, jez tańdaı ánshi Bıbigúl Tólegenova «Dostastyq jul­dyzy» halyqaralyq syı­ly­ǵy­nyń laýreaty atandy. TMD elderi memleket­aralyq gýmanıtarlyq yn­tymaqtastyq qorynyń Dos­tastyq elderi arasynda belgilegen bul syılyǵy 2009 jyldan berilip keledi. Ol jyl saıyn ǵylym men bilim berý, mádenıet pen óner, gýmanıtarlyq áreket salalary negizinde Dostastyq elderin álemdik jetistik deńgeıine kóterý jolynda eleýli eńbek sińirip, elder arasynda gýmanıtarlyq yntymaqtastyqty órken­detýge úles qosqan tańdaýly tulǵalarǵa tapsyrylyp turady. «Dostastyq juldyzy» marapaty aqshalaı syı­lyqtan, laýreat dıplomynan, tósbelgisi men onyń kýáliginen turady. Úsh nomı­nasııanyń árbiri boıynsha úsh júlde taǵaıyndalyp, laý­reattardyń árbirine 2 mıllıon Reseı rýbli kóleminde qarjy beriledi. Bıyl atalmysh syılyqty mádenıet pen óner salasy boıynsha Chehov atyndaǵy Máskeý teatrynyń kórkemdik jetekshisi Oleg Tabakov, Ázerbaıjannyń halyq sýret­shisi Omar Eldarov, Ar­menııa memlekettik hor kapellasynyń bas dırıjery Oganes Chekıdjıan aldy. Ǵylym men bilim berý júıesindegi syılyqtarǵa Ýkraına men Reseı ulttyq ǵylym akademııalarynyń akademıgi, belgili ǵalym Borıs Paton, Tájikstan akademııasynyń akademıgi Daler Pachadjanov ıe boldy. Al gýmanıtarlyq salada bizdiń Bıbigúl Tólegenovadan bólek, Belarýstiń «Zvezda» baspa úıiniń dırektory Aleksandr Karlıýkevıch pen onyń orynbasary Aleksandr Badak, Qyrǵyzstannyń halyq sýretshisi Iýrıstanbek Shyǵaev laýreat atandy. Bul kezge deıin «Dostastyq juldyzy» syılyǵyn bizdiń elimizden gýmanıtarlyq sala boıynsha «Bóbek» qorynyń prezıdenti Sara Nazarbaeva, mádenıet jáne óner salasy boıynsha ataqty akter Asanáli Áshimov, ǵylym jáne bilim berý salasy boıynsha kórnekti ǵalym Seıit Qasqabasov alǵan bolatyn. Murat AITQOJA.