Ortaq iske arnalǵan ortalyq

Almaty qalasynan dúleı zilzalalardyń qaýip-qaterin azaıtý jónindegi ortalyq qurylady. Bul jaıly Senat Tóraǵasy Qasym-Jomart Toqaevtyń jetekshiligimen ótken palatanyń keshegi jalpy otyrysynda Reseı jáne Qyrǵyzstanmen tótenshe jaǵdaılarǵa qatysty qarym-qatynastardy retteıtin zań jobalaryn qaraǵan otyrys barysynda aıtyldy. Aldymen depýtattar «1994 jylǵy 28 naýryzdaǵy Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy ónerkásiptik avarııalardyń, apattardyń, dúleı zilzalalardyń aldyn alý jáne olardyń zardaptaryn joıý salasyndaǵy yntymaqtastyq týraly kelisimge avarııalyq-qutqarý qyzmetteri men qurylymdarynyń memlekettik shekarany kesip ótýiniń ońaılatylǵan tártibi týraly hattamany ratıfıkasııalaý týraly» zań jobasyn qarap, qabyldady. Hattamanyń maqsaty – tóten­she jaǵdaılardyń aldyn alý já­ne olardy joıý maqsatynda avarııa­lyq-qutqarý qyzmetteri men qurylymdarynyń memle­ket­tik shekarany kesip ótýiniń ońaı­latylǵan tártibin qamtamasyz etýge quqyqtyq negiz qalaý. Son­daı-aq, zań jobasymen memle­kettik shekarany ót­kizý pýnktteri arqyly jáne qol­danystaǵy ót­ki­zý pýnktterinen tys jerde ke­sip ótýin qamtamasyz etýge ar­nal­ǵan quzyretti organdardy aı­qyn­daıtyn normalar kózdelip otyr. Budan basqa, tótenshe jaǵ­daı­lardyń aldyn alý jáne sal­­darymen kúresýge arnalǵan qa­zaq­­standyq-reseılik ǵaryshtyq mo­­nı­torıng jasaý júıesiniń j­o­ba­sy ázirlenip jatqany málim boldy. Sonymen qatar, jalpy otyrys barysynda «Qazaqstan Res­pýblıkasynyń Úkimeti men Qyr­ǵyz Respýblıkasynyń Úki­meti arasyndaǵy Tótenshe jaǵ­daı­lar jáne dúleı zilza­lalardyń qaýip-qaterin azaıtý jónindegi ortalyqty qurý týraly kelisimdi ratı­fıkasııalaý týraly» zań joba­sy da qoldaý tapty. Tóten­she jaǵdaılar mınıstriniń min­de­tin atqarýshy Vladımır Boj­ko mundaı bastama BUU Damý baǵ­darlamasy tarapynan, BUU Gýma­nıtarlyq máselelerdi úı­les­tirý jáne halyqaralyq stra­­tegııa basqarmasy, Dúleı zil­za­la­lardyń qaterin tómendetý jó­nin­degi Azııa ortalyǵy tarapy­nan qoldaý tapqandyǵyn atap kór­setti. Almaty qalasynda qury­la­tyn bul ortalyqqa BUU Aımaq­tyq qurylymdary, Germa­nııa­nyń, Japonııanyń jáne basqa da elderdiń halyqaralyq ynty­­maqtastyq agenttikteri qyzy­ǵýshylyq tanytýda. Kóptegen uıym­dar atalǵan ortalyqty tóten­she jaǵdaılar salasyndaǵy joba­lardy júzege asyratyn alań retinde qarastyratyny da aıtylmaı qalmady. Negizinen, Ortalyq Prezıdent N.Nazarbaevtyń Al­maty qalasynda kópjaqty dıp­lo­matııalyq hab qurý týraly júktegen tapsyrmalaryn da jú­zege asyrýmen baılanysty. Ortalyqtyń jumysy aıasynda BUU-nyń elimizdegi gýma­nı­tarlyq qoımalaryn qurý máse­lesi qarastyrylady dep kúti­lýde. Mundaı qoımalar aımaq elde­rine gýmanıtarlyq kómekter kórsetýge baǵyttalady jáne olardy materıaldyq qormen qamta­masyz etý qazaqstandyq taýar óndirýshilerge júk­te­lýi múm­kindigi alǵa tartyl­dy. Aý­ǵanstan Islam Respýb­lıkasynan Almatyda qurylatyn ortalyqqa qosylýǵa nıetti eken­dikterin bildirgen nota kelip tús­­kendigi belgili boldy. Jáne de Tá­­jik­stan, Ázerbaıjan men Pákis­tan qyzyǵýshylyq tanytýda eken. Sonymen birge, palata «2008 jylǵy 12 jeltoqsandaǵy Tarıf­tik kvotalardy qoldanýdyń sharttary men tetigi týraly kelisimge ózgerister engizý týraly hattamany ratıfıkasııa­laý týraly» zań jobasyn da qarap, qabyldady. Bul jerde Hattama 2008 jylǵy 12 jeltoqsandaǵy Tarıftik kvotalardy qoldanýdyń sharttary men tetigi týraly kelisimniń normalaryn 2011 jylǵy 18 qara­shadaǵy Eýrazııalyq ekono­mıkalyq komıssııa týraly shart­­tyń normalaryna sáıkes kelti­rýdi kózdeıdi. Budan ózge, zańdyq qujat Keden odaǵyna múshe elder arasyndaǵy aýyl sharýashylyǵy taýarlarynyń jekelegen túr­lerine tarıftik kvotalardyń kó­lemin bólýge múmkindik beredi. Depýtattar kún tártibine shy­ǵarylǵan «1928 jylǵy 22 qa­rashadaǵy Halyqaralyq kórme­ler týraly konvensııany, oǵan 1948 jylǵy 10 mamyrdaǵy, 1966 jylǵy 16 qarashadaǵy, 1972 jylǵy 30 qarashadaǵy Hatta­ma­lardy, sondaı-aq, 1982 jylǵy 24 maýsymdaǵy jáne 1988 jylǵy 31 mamyrdaǵy Túzetýlerdi ratıfıkasııalaý týraly» zań jobasyn da qabyldaǵanyn aıta ketý kerek. Konvensııany ratıfıkasııa­laý EKSPO-2017 halyqaralyq mamandandyrylǵan kórmesin uıymdastyrý men ótkizý úshin jaǵdaılar jasaýǵa kómektesedi. Atap aıtqanda, kórmeni uıym­dastyrýshyny aıqyndaý tártibi, tirkelgen kórmeler uıym­das­ty­rýshylarynyń jáne qaty­sýshy memleketterdiń mindet­temeleri belgilenedi. Bul jerde kórsetilgen qaǵıdalar EKSPO kórmelerinde kórsetýge nemese paıdalanýǵa arnalǵan taýarlardy ákelýdiń jeńildikti rejimin qamtamasyz etetin bolady. Asqar TURAPBAIULY, «Egemen Qazaqstan».