Moratorıı mańyzy

Muny aýyldaǵylar jaqsy sezinip otyr

Úrjar aýdanynyń jeke kásipkeri Nurzııa SAǴATPEKOVA jergilikti is-sharalarǵa belsene qatysyp, qarjylaı qoldaý kórsetip júredi. «Gúlnaz» JShS-ine jetekshilik etip otyrǵan ol búginde qyryqqa jýyq adamdy jumyspen qamtyp otyr. Nurzııa hanymmen áńgimeleskenimizde memleket tarapynan shaǵyn jáne orta bızneske jasalyp otyrǵan qoldaýdy aýyldy jerlerdegi kásipkerler de sezinip otyrǵanyn jetkizdi. – Nurzııa Nurahmetqyzy, úrjarlyq kásipkerler arasynda áleýmettik is-sharalarǵa jıi atsalysyp júretinińizdi baıqaımyz. «Kásip túbi – násip» degendeı, aýdan turǵyndaryna násip bolyp otyrǵan kásibińizdi alǵash qalaı bastaǵanyńyz esińizde me? – Men 1961 jyly Úrjar aýylynda dúnıege keldim. 1979 jyly osy aýyldaǵy Abaı atyndaǵy orta mektepti, 1983 jyly Ań terisi jáne bylǵary tehnıkýmyn taýartanýshy mamandyǵy boıynsha bitirdim. Toqsanynshy jyldary zaman aýnap tústi ǵoı. Biz de sol kezden bastap túrli kásip istedik. Táýelsizdik alǵanymyzǵa bórkimizdi aspanǵa atyp qýanǵanymyzben, naryqtyq qoǵamnyń ańysyn ańdap eńbek etý kerek boldy. Men de sol jyldary beleń alǵan saýdagerlikten shet qalmadym. Toqsanynshy jyldardyń basynda kópshilikpen birge saýda jasadym. Máskeý, Tashkent qalalaryna deıin tynymsyz júretinmin. Úrjardyń ataqty shujyǵyn syrtqa, syrttan qat taýardy aýylǵa tasydym. О́stip ala sómkeden bastalǵan saýdamyz úzdiksiz eńbektiń nátıjesinde óristep, ózimizdiń otbasylyq bıznesimizdi qurýǵa múmkindik týdy. Qazirgi kezde «Gúlnaz» JShS-niń jetekshisimin. Búgingi tańda Úrjar aýdanyn áleýmettik baǵa boıynsha taýarlarmen qamtamasyz etemiz. Osydan úsh jyl buryn aýdan ortalyǵynda «Gúlnaz» saýda úıiniń qurylysyn júrgizdik. Bul ámbebap saýda kesheni aýdan turǵyndaryna túrli qyzmet usynady. «Gúlnaz» saýda kesheniniń jalpy aýmaǵy 200 sharshy metrdi quraıdy. Bul dúkendi keńeıtý úshin bankten nesıe alyp jumys istedik. Azyq-túlik jáne sharýashylyq taýarlary saýdalanady. Negizinen, Semeı men Alma­ty qalalarynan tasymaldaımyz. – Taýardy áleýmettik baǵada usynǵanymen, kásipkerler de belgili dárejede paıda tabý kerek ekeni belgili. Úrjar – shetki aýdandardyń biri bolǵandyqtan, oǵan taýar tasymaldaý da ońaı sharýa emes. Mundaı jaǵdaıda áleýmettik baǵany qalaı saqtaý­ǵa bolady? – Memleket basshysy Nur­sul­tan Nazarbaev baǵanyń ósimine jol bermeý jóninde naqty tapsyrmalar júktegenin bilemiz. Bul, ásirese, qarapaıym aýyl turǵyndary úshin qajet. Biz de Elbasy saıasatyn óz tarapymyzdan qoldaımyz. Al bizdiń qoldaýymyz naqty is júzinde júzege asady. Iаǵnı qymbatshylyqty boldyrmaý, onyń aldyn alý úshin meılinshe kúndelikti tutynýshylarymyzǵa asa qajetti azyq-túlik baǵa­myn bu­rynǵy deńgeıinde qal­dyr­ǵandy jón kórip otyrmyz. Biz kóbinese tasymaldaý shyǵy­nyn aqtaýdy oılastyramyz. My­saly, saýda ortalyǵynda nan­nyń birinshi suryptaǵy bir bólkesi – 45 teńgeden, qanttyń bir kılosy 170 teńgeden, kúrish 150 teńgeden saýdalanýda. Sol sııaqty, basqa azyq-túlikke de baǵa burynǵy qalyptasqan deńgeıinde qalyp otyr. «Keń bolsań, kem bolmaısyń» degendeı, búgingi jaǵdaıdy túsinip, osy baǵytta jumys isteýge basqa áriptesterimdi de shaqyramyn. Onyń ústine, osydan bir aı buryn Elbasynyń pármenimen kásipkerlikti tekserýge moratorıı jarııalandy. Sodan beri tekserý tyıyldy. Bizdi sanı­tarlyq-epıdemıologııalyq stansa qyzmetkerleri men salyq bó­li­miniń mamandary jıi tek­sere­tin. Qazir jumysymyzǵa eshkim bóget keltirip jatqan joq. Ne­gizi, óz qyzmetin taza at­qar­ǵan kásip­ker qandaı tekserý kelse de qysylmaıdy. Tek qaǵaz­bas­tylyq qana ýaqytty alady. Osy jaǵynan alǵanda bizge mora­to­rııdiń paıdasy úlken bolyp tur. Qazirgi kezde aýdandaǵy «Sha­paǵat» múmkindigi shekteýli balalardy ońaltý ortalyǵyna, balalar úıine, aýdanda ótetin merekelik is-sharalarǵa, áleý­mettik jaǵynan az qamtylǵan otbasylarǵa qar­jy­laı kómekter kórsetemiz. Jár­meńkelerge qatysyp, tómen baǵalarmen taýar­larymyzdy satamyz. Bir jyl ishinde aýdan kóleminde 1 mıllıon teńgeden astam qarjy kóleminde áleýmettik kómek kórsettik. Meniń oıymsha, ár qazaqstandyq jeke kásipker bolsa, elimiz jyldan-jylǵa gúldene beredi. О́ıtkeni, salyq túsiminiń basym bóligin shaǵyn jáne orta bıznes nysandary beretini belgili. Sondyqtan, shaǵyn jáne orta kásipkerlerdi memlekettik qamqorlyqqa alyp otyrǵan El­basyna aıtar alǵysymyz sheksiz. Áńgimelesken Dýman ANASh, «Egemen Qazaqstan». Shyǵys Qazaqstan oblysy, Úrjar aýdany.