Keshe, 4 sáýir kúni Belgııanyń astanasy – Brıýssel qalasynda ereýilge shyqqandar polısııamen qaqtaǵysty. Bul týraly ITAR-TASS habarlady.
Tártip saqshylarymen jaǵa ustasýda manıfestanttar arasynda zardap shekkender sany 27-ge jetti. RTBF telearnasynyń habarlaýynsha, kásipodaqtar uıymdastyrǵan demonstrasııaǵa qatysýshylar Eýropa odaǵy qabyldap jatqan «qatań únem» sharalaryna qarsylyq bildirý maqsatynda kóshege shyqqan.
Telearna «dárigerlerdiń málimetinshe, segiz adamnyń aýrýhanaǵa jatqyzylǵanyn, alaıda, olardyń ómirlerine tónip turǵan qaýip joqtyǵyn, taǵy 16 qatysýshynyń oqıǵa ornynda qamaýǵa alynǵanyn» atap ótti.
Polısııadaǵylar «qaqtyǵystyń nátıjesinde quqyq qorǵaý organdary úsh qyzmetkerleriniń jaraqat alyp qalǵanyn» málimdedi.
Tártipsizdikter Eýroodaq ınstıtýty ornalasqan oramda bastaldy. Ereýilge shyqqandar polısııa qyzmetkerlerine apelsınder men basqa da zattar laqtyrdy. Buǵan tártip saqshylary kózden jas aǵyzatyn gazben jáne sýmen jaýap berdi.
Aksııaǵa qatysýshylar «Eýropanyń qatań únemsiz jańa joly» úshin daýys kóterip, «uzaq ýaqyt damýdy qamtamasyz etetin qýatty ınvestısııa» ákelinýin, jumys oryndaryna joǵary bilikti mamandardy alýdy talap etti. Uıymdastyrýshylardyń aıtýlarynsha, sharaǵa 50 myńǵa jýyq adam qatysqan. Al polısııa bulardyń sanyn 25 myńnan asyryp otyrǵan joq.
Manıfest saldarynan qalanyń kóptegen ortalyq kósheleri jabylyp qaldy. Nátıjesinde alty saǵat boıy kólikterdiń júrisi toqtap turdy.
Sáken Maılybaı.
Derekkóz: ITAR-TASS.
Foto: ITAR-TASS.