Atyraý oblysynda turatyn Uly Otan soǵysynyń ardageri Aleksandr Pogadaev 2001 jyldan bastap qaıtys bolǵandar tizimine engizilgen. Bul týraly Gazeta.kz habarlady.
«Bul jaıt kezdeısoq biz halyqqa qyzmet kórsetý ortalyqtaryna júgingen kezimizde belgili boldy. Kýálikke belgi salyp, ortalyqta bizge qyzmet kórsetken qyz mundaı anyqtama ala almaıtynymyzdy aıtty. О́ıtkeni, Aleksandr Ivanovıch Pogadaev málimetter bazasynda 2001 jyldan qaıtys bolǵandar sanatynda bolyp shyqty», - deıdi ardagerdiń nemeresi Olga Sbıtneva.
A. Pogadaev Atyraý óńirine tanymal azamat. Uly Otan soǵysynyń ardageri, ishki ister qyzmetiniń otstavkadaǵy polkovnıgi. Ol sondaı-aq atyraýlyq ardagerler qorynyń jáne «Frontovıchka» eńbek ardagerleri qorynyń beldi múshesi.
«Taǵy bir qyzyǵy, 2004 jyly atamyz jańa jeke kýálik jáne sheteldik tólqujat aldy. Birneshe ret shetelde demaldy. 2013 jyly memleketten páter aldy. Tiriler tiziminde joq adamdy qalaı shetelge ótkizgen? Tipti páterdi rásimdeýdi aıtpaǵanda», - deıdi sóz oraıynda O.Sbıtneva.
Ardager nemeresiniń aıtýy boıynsha, jergilikti jerde jiberilgen bul óreskel qatelikti túzeý ońaıǵa soqpaı tur. Al osyndaǵy halyqqa qyzmet kórsetý ortalyqtaryndaǵy qyzmetkerler bolsa, ardagerdiń týystaryna «kútińder, túzetý engizemiz»,-deýmen keledi.
Bir tańqalarlyǵy, týystary jaqynda 90 jasqa tolatyn ardagerge onyń budan 13 jyl buryn tiriler sanatynan shyǵyp qalǵanyn áli aıtpaǵan kórinedi.
Ámirhan Almaǵanbetov.
Derekkóz: Gazeta.kz.
Foto:www.Tv100.ru.