Túrkistan oblysynyń polıseıleri kishkentaı balasymen iz-tússiz joǵalyp ketken áıeldi Shymkentten tapty, dep habarlaıdy Egemen.kz Polisia.kz-ke silteme jasap.
10 maýsymda tórt aılyq kishkentaı balasymen birge úıinen belgisiz baǵytqa shyǵyp ketip, iz-tússiz joǵalǵan jas áıel Túrkistan oblysy polıseıleriniń júıeli jáne josparly túrde jasaǵan jumysynyń arqasynda tabylǵan.
14 maýsymda Saýran aýdandyq polısııa bólimine jergilikti turǵyn aryzdanyp, kelini men tórt aılyq nemeresi joǵalǵanyn aıtyp, kómek suraı kelgen. Aryz túse salysymen tártip saqshylary tolyq quramda jumyldyrylyp, izdeý jumystaryn júrgizdi. Polıseıler áıeldiń barýy múmkin degen oryndardy tekserip, tanystarynyń arasynda surastyrý jumystaryn atqardy.
Iz-tússiz joǵalǵandardy izdeý jumysyna eriktiler de tartyldy. Tártip saqshylary joǵalǵan áıeldiń aıryqsha belgilerin jazyp, sýretimen birge buqaralyq aqparat quraldaryna, saıttarǵa joldady. Shuǵyl izdestirý jumystarynyń nátıjesinde, 4 kúnde iz-tússiz ketken áıel men kishkentaı náreste Shymkent qalasyndaǵy áıelderge arnalǵan daǵdarys ortalyǵynan tabyldy.
Belgili bolǵandaı, jas áıel enesimen arasynda bolǵan otbasylyq kelispeýshiliktiń saldarynan jaqyndaryna aıtpaı ketip qalǵan. Joǵalǵan kelinshektiń densaýlyǵyna tónip turǵan qaýip joq, jaǵdaıy jaqsy. Týystaryna aman-esen tapsyryldy.