Memleket basshysy Qasym-Jomart Toqaev Túrkistan oblysyna sapary aıasynda óńir jurtshylyǵymen kezdesýin bastady, dep habarlaıdy Egemen.kz Prezıdenttiń baspasóz qyzmetine silteme jasap.
«Túrkistan – Atajurtymyzdyń altyn qazyǵy. Túrkistan – bárimizdiń maqtanyshymyz, eki dúnıe esigi, er túriktiń besigi atanǵan búkil álemge tanymal qasıetti jer. Osy kıeli shahardyń tól tarıhymyzda aıryqsha orny bar. Túrkistan tórindegi Qoja Ahmet Iаsaýı kesenesi – rýhanııatymyzdyń myzǵymas dińgegi», dep Prezıdent jıyndaǵy sózin bastady.
Qasym-Jomart Toqaev óz sózinde ótken jyly qalaǵa Túrki áleminiń rýhanı astanasy degen mártebe berilgenin eske saldy.
«Qazaq jylnamasyna altyn árippen jazylǵan kóptegen tulǵalarymyz osynda jerlengen. Byltyr qalaǵa Túrki áleminiń rýhanı astanasy degen mártebe berildi. Bul Túrkistandy tutas túrki jurty erekshe qadirleıdi degen sóz. Al, biz kıeli shahardy rýhanı jáne tarıhı elordamyz desek, durys paıym bolatynyna kúmánim joq. Sondyqtan Úkimet taıaý arada Túrkistan qalasyna osyndaı mártebe berý máselesine qatysty laıyqty sheshim qabyldaıdy dep oılaımyn. Qasterli shahar kóne zamannan beri ulttyń uıasy, qazaqtyń qara shańyraǵy bolyp keledi», dedi Memleket basshysy.