Túrkistan oblysynyń taýlarynda joǵalǵan 12 adamdy izdestirý jumystary júrgizilip jatyr, dep habarlaıdy Egemen.kz Tótenshe jaǵdaılar mınıstrliginiń baspasóz qyzmetine silteme jasap.
Búgin saǵat 10:00-de Túrkistan oblysy TJD 112 pýltine Báıdibek aýdany Baıjansaı taýyna eki avtokólikpen jolǵa shyqqan adamdardyń joǵalǵany týraly habarlama kelip túsken.
Izdestirý jumystaryna Túrkistan oblysy TJD qutqarýshylary men ótimdiligi joǵary tehnıkasy jumyldyryldy. Aýa raıynyń qolaısyzdyǵyna baılanysty TJM izdeý jumystaryn tikushaq arqyly jalǵastyratynyn málimdedi.
Joǵalǵan adamdar sońǵy ret 2023 jyldyń 3 qańtarynda saǵat 16:00-de týystarymen baılanysqa shyqqan. О́tinish ıesiniń aıtýynsha joǵalǵan adamdar 3 qańtar kúni Shymkent qalasyna oralýy qajet edi.
Túrkistan oblysynyń Tótenshe jaǵdaılar departamenti aýa raıyna baılanysty eskertýlerge qulaq asýǵa keńes beredi.