Premer-mınıstr Álıhan Smaıylov Indýstrııa jáne ınfraqurylymdyq damý mınıstrliginiń alqa májilisinde vedomstvonyń aldynda turǵan basym mindetterdi atap kórsetti, dep habarlaıdy Egemen.kz Úkimettiń baspasóz qyzmetine silteme jasap.
Indýstrııa jáne ınfraqurylymdyq damý mınıstri Marat Qarabaevtyń habarlaýynsha, ónerkásip salasynda 2022 jyldyń qorytyndysy boıynsha ósim 1,1%-dy qurady. Atap aıtqanda, óńdeý ónerkásibindegi óndiris kólemi 3,4%-ǵa ósti. Qalǵan sektorlar da túgelge derlik ósim kórsetti.
Sonymen qatar jalpy quny 2 trln teńgeni quraıtyn 160 joba iske asyryldy, 14,4 myń jumys orny quryldy. Qyzylorda oblysynda shyny óndirisi boıynsha, Atyraý oblysynda polıpropılen, Qaraǵandy oblysynda avtomobıl shınalary, Shymkent qalasynda alıýmınıı bankalaryn shyǵarý sııaqty negizgi jobalar iske qosyldy. Jambyl oblysyndaǵy azot-fosfor tyńaıtqyshtaryn óndirý qýaty 2 esege ulǵaıtyldy.
Alqa májilisi aıasynda qatysýshylar ónerkásip, qurylys, kólik jáne geologııalyq salalardy odan ári damytý jónindegi josparlardy, sondaı-aq turǵyn úı-kommýnaldyq sharýashylyq salasyndaǵy is-sharalardy talqylady.
Premer-mınıstr óz sózinde osy jyly Indýstrııa jáne ınfraqurylymdyq damý mınıstrliginiń aldynda qazirgi syn-qaterlerge tótep beretin birqatar mańyzdy mindet turǵanyn atap ótti. Onyń sózinshe, taý-ken óndirý salasyn damytýǵa serpin berip, óńdeý ónerkásibinde jańa óndirister qurý jónindegi jumysty kúsheıtý qajet.
«Ekonomıkany ártaraptandyrý qarqynyn tómendetýge bolmaıdy. Bizdiń aldymyzda jyl saıyn shamamen 4-5% deńgeıinde eldiń JIО́-niń turaqty ósýin qamtamasyz etý mindeti tur. Osyǵan baılanysty Indýstrııa jáne ınfraqurylymdyq damý mınıstrligi óńirlerdiń ákimdikterimen birlesip, onyń ishinde 2023 jyly da ındýstrııalyq jobalar pýlyn keńeıtýi qajet. Ásirese ımportty almastyrýǵa basa nazar aýdarylýy tıis», dedi Álıhan Smaıylov.
Bul rette ol monoqalalardyń damýyn eskerý mańyzdy ekenin aıtty. Ondaǵy jańa kásiporyndar halyqty qosymsha jumyspen qamtamasyz etedi.
Sondaı-aq Úkimet basshysy qazaqstandyqtardyń avtojoldardyń sapasyna, onyń ishinde júrgizilip jatqan jóndeý jumystaryna qatysty shaǵymdary bar ekenin atap ótti.
«Jóndelgen ýchaskeler qaıtadan jıi buzylyp jatady. Jóndeý jumystary adamdar úshin emes, jol jumysshylarynyń ózderi úshin jasalatyn sııaqty. Marat Kárimjanuly (Qarabaev – QR IIDM basshysy), bul máseleni erekshe baqylaýda ustap, ony tıimdi sheshýge múmkindik beretin sharalar keshenin ázirleý qajet», dedi Álıhan Smaıylov.
Onyń aıtýynsha, bul máselede tıimdi josparlaý, kelisimsharttardy engizý, tehnıkalyq qadaǵalaýdy kúsheıtý, sıfrlandyrý jáne t. b. asa mańyzdy.
Sonymen qatar otyrys barysynda Premer-mınıstr Qazaqstannyń kólik júıesin halyqaralyq dálizdermen odan ári ıntegrasııalaý boıynsha jumystyń mańyzdylyǵyn atap ótti. Bul elimizge aımaqtaǵy negizgi «tranzıttik habtardyń» birine aınalýǵa, sondaı-aq Aqtaý jáne Quryq porttaryn damytýǵa, «Aqtaý teńiz porty» AEA bazasynda logıstıkalyq hab qurýǵa, QTJ transformasııalaýǵa, temirjoldar salýǵa jáne jyljymaly quramdy jańartýǵa múmkindik beredi.
Onyń aıtýynsha, turǵyn úı qurylysynda jáne ınjenerlik ınfraqurylymdy jańǵyrtýda barlyq josparlanǵan kórsetkishterge qol jetkizýdi qamtamasyz etý qajet.
Qorytyndylaı kele, Premer-mınıstr «KAZNEDRA» aqparattyq platformasyn ónerkásiptik paıdalanýǵa berýdi jedeldetýdi, Minerals.gov.kz jer qoınaýyn paıdalanýshylardyń biryńǵaı platformasyndaǵy fýnksııalardy avtomattandyrýdy, arnaıy ekonomıkalyq aımaqtardyń tıimdiligin arttyrý boıynsha olardyń jumysynyń jańa modelin engizý arqyly jan-jaqty sharalar qabyldaýdy, shıkizatpen qamtamasyz etý jáne daıyn ónimdi ótkizý úshin otandyq kásiporyndarǵa qoldaý kórsetýdi tapsyrdy.