Búgin Qarmaqshy aýdanynda oblys ákimi Nurlybek Nálibaevtyń tóraǵalyǵymen ótken aktıv otyrysynda Qarmaqshy aýdanynyń jańa ákimi tanystyryldy, dep habarlaıdy Egemen.kz ákimdiktiń baspasóz qyzmetine silteme jasap.
Oblys ákiminiń ókimimen Qazaqstan Respýblıkasy Prezıdenti Ákimshiligi jáne Qarmaqshy aýdandyq máslıhatynyń kelisimderi boıynsha Qarmaqshy aýdanynyń ákimi laýazymyna Jandos Erkinbek taǵaıyndaldy.
Aımaq basshysy Jandos Erkinbekulyn quttyqtap, jańa qyzmetinde sáttilik tiledi.
Sondaı-aq oblys ákimi osy ýaqytqa deıin Qarmaqshy aýdanynyń ákimi qyzmetin atqarǵan Ádilbek Ersultanovty basqa qyzmetke aýysýymen quttyqtap, oǵan aýdannyń áleýmettik-ekonomıkalyq damýyna, qoǵamdyq-saıası ahýaldyń turaqty bolýyna súbeli úlesin qosqany úshin alǵys bildirdi.
Jıynda aýdandyq ardagerler keńesiniń tóraǵasy Asqar Merekov aýdan jurtshylyǵynyń atynan sóz sóılep, jańa aýdan ákimin osy laýazymǵa taǵaıyndalýymen quttyqtady jáne burynǵy ákim Ádilbek Ersultanovqa rızashylyǵyn bildirdi.
Erkinbek Jandos Erkinbekuly 1983 jyly Qarmaqshy aýdanynda dúnıege kelgen.
2004 jyly Qazaqstan Ulttyq qaýipsizdik komıtetiniń Áskerı ınstıtýtyn «bólimshelerdiń qyzmettik-jaýyngerlik is-qımylyn basqarý» jáne 2008 jyly Qazaq gýmanıtarlyq zań ýnıversıtetin «quqyqtaný» mamandyqtary boıynsha bitirgen.
Eńbek jolyn 2004 jyly áskerı qyzmetten bastap, 2013 jylǵa deıin atqarǵan.
2013-2018 jyldary birqatar kompanııada túrli deńgeıdegi jaýapty basshylyq qyzmetterde bolǵan.
2019-2021 jyldary Qyzylorda oblysynyń jumyldyrý daıyndyǵy basqarmasynyń bólim basshysy, 2021-2022 jyldary Qarmaqshy aýdany ákiminiń orynbasary qyzmetterin atqarǵan.
2022 jyldyń mamyr aıynan bastap osy kezge deıin Qyzylorda oblysy ákimi apparaty basshysynyń orynbasary qyzmetin abyroımen atqaryp keldi.