Úkimet qaýlysymen Danıel Vaısov pen Botagóz Jaqselekova ádilet vıse-mınıstrleri qyzmetine taǵaıyndaldy, dep habarlaıdy Egemen.kz.
Danıel Vaısov «Ádilet» Joǵary quqyq mektebin, Narhoz ýnıversıtetin, Reseı memlekettik munaı jáne gaz ýnıversıtetin bitirgen.
Eńbek jolyn 2001 jyly Memlekettik kiris mınıstrliginiń jeke sharty boıynsha operator laýazymynan bastaǵan. 2002 jyldyń naýryz-qazan aılary aralyǵynda QR Memlekettik kiris mınıstrligi Salyq tóleýshilermen jumys departamenti salyq zańnamasyn túsindirý basqarmasynyń salyq tóleýshilermen jumys isteýdiń tıimdi ádisterin ázirleý jáne engizý bóliminiń bas mamanynyń m.a., salyq zańnamasyn túsindirý boıynsha jumysty uıymdastyrý bóliminiń bas mamany qyzmetin atqarǵan.
Sondaı-aq ol Qarjy mınıstrligi Salyq komıtetiniń salyqtyq baqylaý basqarmasynyń májbúrlep óndirip alý bóliminiń bas mamany (2002-2003 jyldar), 2003-2010 jyldary - halyqaralyq kelisimsharttar departamentiniń zańgeri, quqyqtyq qamtamasyz etý departamentiniń aǵa zańgeri, halyqaralyq kelisimsharttar departamentiniń bas zańgeri, «QazMunaıGaz» UK» AQ halyqaralyq kelisimsharttar Departamentiniń birinshi sanatty zańgeri boldy.
2010 jyldan 2020 jylǵa deıin Danıel Vaısov jeke kommersııalyq qurylymdarda jumys istedi.
2020 jyldyń qańtarynan bastap qazirgi ýaqytqa deıin «Báıterek» Ulttyq basqarýshy holdıngi» AQ satyp alýdy baqylaý jónindegi ortalyq qyzmetiniń basshysy qyzmetin atqardy.
Botagóz Jaqselekova A.Baıtursynov atyndaǵy Qostanaı memlekettik ýnıversıtetin bitirgen, Exeter University, RF Prezıdenti janyndaǵy Reseı halyq sharýashylyǵy jáne Memlekettik qyzmet akademııasynda bilim alǵan.
Eńbek jolyn 2001 jyly Ádilet mınıstrligi kadr jumysy basqarmasynyń mamany qyzmetinen bastaǵan. 2002-2007 jyldary QR ÁM qurylymynda ártúrli laýazymdardy atqardy. 2007-2012 jyldary - QR ÁM zańnama departamenti dırektorynyń orynbasary. 2012-2013 jyldary - QR ÁM memlekettik múlikti quqyqtyq qorǵaý departamentiniń bas sarapshysy. 2013-2015 jyldary - Respýblıkalyq bıýdjettiń atqarylýyn baqylaý jónindegi esep komıteti meńgerýshisiniń orynbasary, zań bóliminiń meńgerýshisi.
2015-2017 jyldary «SK-Farmasııa» JShS strategııalyq damý jáne qoǵammen baılanys bóliminiń bastyǵy, Basqarýshy dırektor, strategııa, taldaý jáne halyqaralyq qatynastar departamentiniń dırektory bolyp jumys istedi.
2017-2018 jyldary - Densaýlyq saqtaý mınıstrligi Medısınalyq qyzmetterge aqy tóleý komıtetiniń tóraǵasy. 2018-2019 jyldary - «Áleýmettik medısınalyq saqtandyrý qory» KEAQ Basqarma tóraǵasynyń orynbasary.
2019-2020 jyldary - QR DSM jaýapty hatshysy.
2021 jyldyń sáýir aıynan bastap qazirgi ýaqytqa deıin Botagóz Jaqselekova jeke kommersııalyq qurylymdarda basshylyq laýazymdarda jumys istedi.
2023 jyldyń 13 aqpanynda Qazaqstan Úkimetiniń qaýlysymen Aqerke Ahmetova basqa jumysqa aýysýyna baılanysty ádilet vıse-mınıstri qyzmetinen bosatylǵany habarlanǵan edi.