Astana qalasynda Túrki akademııasy Túrki memleketteri uıymy (TMU) hatshylyǵymen birlesip uıymdastyrǵan «Túrki álemindegi ekonomıkalyq baılanys jáne ıntegrasııa» taqyrybyndaǵy sarapshylar otyrysy ótti, dep habarlaıdy Egemen.kz.
Is-sharanyń ashylý saltanatyna Túrki akademııasynyń prezıdenti Shahın Mustafaev, Qazaqstan Respýblıkasy Syrtqy ister mınıstriniń orynbasary Qanat Tumysh, TMU Aqsaqaldar keńesiniń múshesi, Ázerbaıjan Respýblıkasynyń burynǵy premer-mınıstri jáne burynǵy syrtqy ister mınıstri Gasan Gasanov, Túrki akademııasynyń prezıdenti Azııadaǵy ózara is-qımyl jáne senim sharalary jónindegi keńestiń (AО́SShK) Bas hatshysy Qaırat Sarybaı, Qyrǵyz Respýblıkasy Prezıdenti janyndaǵy Ulttyq strategııalyq zertteýler ınstıtýty Quqyqtyq jáne saıası zertteýler ortalyǵynyń jetekshisi Avtandıl Arabaev, Túrkııa Respýblıkasy kommersııa jáne saýda mınıstrligi Saýdany zertteý jáne táýekeldi baǵalaý bas dırektorynyń orynbasary Raıf Djan, Majarstan Syrtqy ister jáne saýda ınstıtýtynyń bas keńesshisi Laslo Vasa, О́zbekstan Respýblıkasy Prezıdenti Ákimshiligi janyndaǵy Ekonomıkalyq zertteýler jáne reformalar ortalyǵynyń aǵa mamany Fazlıddın Nasrıddınov jáne baýyrlas elderdiń elshileri qatysty. Eki kúnge josparlanǵan alqaly basqosý baýyrlas memleketter arasyndaǵy ekonomıkalyq yntymaqtastyqty nyǵaıta túsý joldaryn qarastyrýǵa arnaldy. Jıyn barysynda qatysýshylar TMU-ǵa múshe elder arasyndaǵy ekonomıkalyq áriptestiktiń áleýeti týraly pikir almasyp, Túrki álemi ekonomıkalyq saıasatyn zertteý ortalyqtarynyń ortaq jelisin qurý múmkindigin talqylady.
Sonymen qatar baýyrlas elderdiń sarapshylary TMU-ǵa múshe elderdiń Memleket basshylary qabyldaǵan «Túrki álemi – 2040» strategııasyn júzege asyrý múmkindikteri boıynsha da oılarymen bólisip, usynystaryn ortaǵa saldy.
Basqosýdyń ashylý saltanatynan keıin semınar jumysy eki seksııa boıynsha jalǵasty.
Atap aıtqanda, «Ulttyq damýdyń basymdyqtary jáne Túrki elderiniń ekonomıkalyq yntymaqtastyǵyn tereńdetý maqsattary» atty birinshi seksııada sarapshylar qoldanystaǵy ulttyq strategııalyq qujattarǵa súıene otyryp, aldaǵy bes jyldaǵy damý basymdyqtaryn tanystyrdy.
Túrki yntymaqtastyǵynyń mańyzdy betburys kezeńi 2021 jyly Ystambulda ótken Memleket basshylarynyń sammıti boldy, onda túrki álemi – 2040 (Vision 2040) kózqarasy qabyldandy jáne osylaısha túrki elderin naqty belgilengen uzaq merzimdi maqsattarmen ıntegrasııalaý boıynsha júıeli jumysqa jol ashyldy. 2022 jyly Samarqandta ótken Túrki memleketteri Uıymynyń 9-shy sammıti osy oń serpindi odan ári nyǵaıtty jáne túrki memleketterin uıymdastyrýdyń 2022-2026 jyldarǵa arnalǵan strategııasyn qabyldady, bul Túrki álemi-2040 kózqarasyn iske asyrýdyń alǵashqy qadamyn belgiledi.