Jambyl oblysynda Ulystyń uly kúni áz-Naýryz merekesin toılaý bastaldy, dep habarlaıdy Egemen.kz.
Oblys ortalyǵynan bólek barlyq qala, aýdandarda da túrli is-sharalar uıymdastyrylyp, kóktem merekesi laıyqty túrde atap ótilýde.
Amal merekesine oraı búgin A.Toqpanov atyndaǵy oblystyq qazaq drama teatrynda «Tórtkúl Hanzadasy» ertegisi jáne «Naýryz dýman» balalarǵa arnalǵan qoıylymnyń premerasy ótti.
Aqyn Sántóre Pirmanovtyń tarıhı ańyz negizinde sahanalanǵan «Tórtkúl Hanzadasy» ertegisinde qazirgi Taraz qalasynyń aýmaǵynda ornalasqan «Tórtkúl» kóne qalashyǵynda bolǵan oqıǵa baıandalady. Oqıǵada el bıleýshisi – Hannyń uly Hanzadanyń el basqarýdy qolyna alǵandaǵy jáne ózine jar tańdaýdaǵy dúıim jurtty tań qaldyrǵan tapqyrlyǵy, aqyl-parasaty utymdy sýretteledi.
Ertegi-qoıylym jas kórermender men búldirshinderdi týǵan eli men jerin, otandy súıýge tárbıelep, ata-baba amanatyna berik bolýǵa shaqyrady.
Budan soń qoıylymnan ádemi áser alǵan balalarǵa «Naýryz dýman» merekelik sharasy uıymdastyryldy. Munda Qydyr ata, Umaı ana, Naýryzbek, Kún, Tún, Aqpan-Toqpan keıipkerleri kishkentaı kórermenderdiń kóńilin baýrap, tabıǵattyń tamasha kórinisterimen qyzyqtyrdy.
Merekelik is-shara án-bımen kómkerilip, birlik pen bereke uǵymdarynyń mán-mańyzyn aıshyqtaı tústi.
Naýryz merekesine arnalǵan túrli deńgeıde sharalardy uıymdastyrý qala, aýdandarda da jalǵasýda.