Búgin Almatydaǵy fızıka-matematıka baǵytyndaǵy NIS oqýshysy Saǵyn Jumadildaev AQSh-tyń Dallas qalasynda ótken álemdegi eń bedeldi ǵylymı jobalar baıqaýynyń biri – International Science and Engineering Fair-dan júldeli II orynmen oraldy, dep habarlaıdy Egemen.kz.
Ol «Matematıka» seksııasy boıynsha «L-tromıno-plıtkalary» jobasyn usyndy, sondaı-aq 1000$ kóleminde syıaqy enshiledi.
– Bir jyl buryn olımpıadada L-tromıno fıgýrasynyń kómegimen plıtkalardy janastyrý boıynsha tapsyrma oryndadym. Osy taqyrypqa qyzyǵýshylyq týyndap, ony joba retinde jasaýdy qolǵa aldym. Áli dáleldenbegen teoremalar bar, sony sheshý arqyly kelesi jyly da ISEF-ke qatysý josparda tur, – deıdi jas matematık.
Sonymen qatar baıqaýǵa Kókshetaýdaǵy Zııatkerlik mekteptiń oqýshysy Asylhan Qalı de qatysyp, «Aq Zhol» jobasyn tanystyrdy. Bul –júrgizýshiniń hali men minez-qulqyn baqylaýǵa múmkindik beretin beınetirkegish jáne jol-kólik oqıǵalarynynyń sanyn azaıtýǵa baǵyttalǵan.
– Qazaqstannyń týyn álemdik arenada kóterip, elimizdiń atynan óner kórsetý – biz úshin úlken mártebe. Bolashaqta odan da jaqsy nátıjege jetý úshin bar kúsh-jigerimizdi salamyz, – dep Asylhan óz áserimen bólisti.
NIS ujymy, ata-analary men dostary Saǵyn men Asylhandy elordanyń áýejaıynda qarsy aldy.
International Science and Engineering Fair – 13 pen 18 jas aralyǵyndaǵy jasóspirimderge arnalǵan STEM jobalardyń dúnıejúzilik baıqaýy. Halyqaralyq shara jyl saıyn ótedi jáne álemniń 100 elinen kelgen 2000 oqýshynyń arasynan úzdikterdi anyqtaıdy.