Túrkistan oblysynyń 8 oqýshysy jas sýretshilerdiń «Boıaýlar qupııasy» respýblıkalyq baıqaýyna joldama aldy. Túrkistandaǵy «Oqýshylar saraıynda» ótken baıqaýdyń oblystyq kezeńinde olar birinshi oryndy ıelendi.
Oqýshylardyń kórkemdik, shyǵarmashylyq qabiletterin damytý, kásibı baǵdarlanýyn yntalandyrý, estetıkalyq, gýmanıstik jáne patrıottyq sezimderin oıatý, balalar kórkemsýret mektepteriniń rólin arttyrý maqsatyndaǵy baıqaýda 136 bilim alýshy baq synady. Jas qylqalam sheberleri aldymen aýdandyq jáne qalalyq irikteý kezeńinen ótip, úzdik dep tanylǵandar oblystyq kezeńge joldama alǵan bolatyn.
Qatysýshylar 45 mınýt ishinde «Meniń elim – meniń jerim» taqyrybynda klassıkalyq keskindeme saldy. Taqyryptyq natıýrmortta turmystyq zattardyń nemese halyq qolóneri men qolóner buıymdarynyń beınesin keskindedi. «Talanttar palıtrasy» arqyly avangard jáne eksperımenttik keskindemeler men kompozısııalyq týyndysyn kórsetti. Sondaı-aq sıýjettik kompozısııa retinde «Jer betindegi úzdik demalys», «Meniń áýestigim», «Men jáne meniń otbasym» taqyrybyna sáıkes oılaryn sýret arqyly jetkizdi.
Qazylar alqasynyń sheshimi negizinde júldeli oryndar anyqtalyp, jeńimpazdarǵa qarjylaı syıaqy tabystaldy.
Túrkistan oblysy