Tólebı aýdany Alǵabas eldi mekenindegi jalpy orta mektepke memleket jáne qoǵam qaıratkeri Sádýaqas Temirbekovtiń esimi berilýine baılanysty arnaıy is-shara ótti. Ǵalymnyń bıýsti men murajaı kabıneti ashyldy.
Jıynda kórnekti ǵalym-pedagog, mádenıettanýshy, fılosof, professor Sádýaqas Temirbekovtiń ómir jolynan estelikter aıtyldy. Elge sińgen eńbegi týraly baıandama jasaldy. Aýyldan jyraq júrse de týǵan jerge qamqorlyq tanytyp, shapaǵatyn tıgizgen ǵalym talapty, oqýǵa, bilimge umtylǵan jastardyń joǵary oqý ornyna túsýine járdem berip otyrǵan. Sondaı-aq Ortalyq Komıtettiń ǵylym jáne oqý oryndary bólimin basqarǵan jyldary Almaty sáýlet-qurylys jáne Almaty teatr-óner ınstıtýttarynyń, Qostanaı men Kókshetaýdaǵy aýylsharýashylyq ınstıtýttarynyń, Qaraǵandy pedagogıkalyq ınstıtýtynyń ashylýyna yqpal etti. Eńbegi halyq tarapynan joǵary baǵalandy.
Ǵylymı-pedagogıkalyq qyzmetinde S.Temirbekov júıeli túrde mádenıettiń tarıhy men teorııasyn túbegeıli zertteýmen aınalysqan. Alǵashqylardyń biri bolyp, «Mádenıettanýǵa kirispe» atty ýnıversıtet stýdentterine arnalǵan oqýlyq jazdy. Onyń qalamynan 70-ten asa mádenıettiń ózekti máselelerine arnalǵan ǵylymı maqala týǵan. Qazaqtyń rýhanı dúnıesin molaıtýǵa, jańǵyrtýǵa úles qosqan tulǵa 35 jasynda, ıaǵnı 1967 jyly jańadan ashylǵan Shymkent pedagogıkalyq mádenıet ınstıtýtynyń rektory bolyp taǵaıyndalǵan. S.Temirbekov basshylyq etken jyldarda kafedralardyń sany beseýden 13-ke, oqytýshylar sany 137-ge jetti. Oqý ornyn basqarǵan 11 jylda ınstıtýttyń materıaldyq bazasy qalyptasyp, professorlyq-pedagogıkalyq quram jınaqtaldy, kóptegen jetistikke jetti. Professor S.Temirbekovtiń jetekshiligimen fılosofııa ǵylymdary salasynda úsh kandıdattyq dıssertasııa qorǵaldy.
– О́tken ǵasyrda Qazaqstandy Kolbın basqarǵan kezeńde ol qýǵyn-súrginge túsken ult tulǵalaryn qorǵaý jaǵynda bolǵany málim. Akademık О́mirbek Joldasbekovtiń jazyqsyz jaladan basyna is túskende janynan tabylyp, qolynan kelgen jaqsylyǵyn aıanyp qalǵan joq. Sol bir qıyn-qystaý kezeńde shyn dostyqty, shynaıy janashyrlyqty kórsete bildi. Sádýaqas aǵamyz dúnıe jınaǵan joq. Adal qyzmetimen, ónegeli ómirimen abyroıly boldy. Aýyly ǵana emes el maqtan tutatyn azamat edi, – deıdi aýdandyq ardagerler keńesiniń tórǵasy Átirhan Shyńǵysbaev.
S.Temirbekov atyndaǵy jalpy orta mekteptiń dırektory Medet Balyqbaevtyń aıtýynsha, mekteptiń ataýyn ózgertý, ǵalymnyń esimin berý máselesi osydan 6 jyl buryn 2016-2017 oqý jylynyń sońynda ótken úlken jınalysta kóterilgen eken. «Jıynda uıymdastyrý alqasy quryldy. Sol ýaqytta bastaý alǵan is ońynan sheshilip, respýblıkalyq onomastıkalyq komıssııasynyń sheshimimen mektebimizdiń ataýy 2023 jyldyń 20 qańtarynan bastap «Sádýaqas Temirbekov atyndaǵy jalpy orta mektebi» bolyp ózgertildi. S.Temirbekovtiń inisi Amangeldi jáne nemere inisi Ilıas Tórebekuly demeýshilik jasap, mektep ǵımaratynyń syrtyn kúrdeli jóndeýden ótkizip, zamanaýı úlgidegi saıdıngpen qaptap berdi. Olarǵa mektep ujymy atynan aıtar alǵysymyz sheksiz», deıdi mektep dırektory.
S.Temirbekovtiń sharapaty aýyldyń búgingi jas urpaǵyna da tımek, ıaǵnı mektep oqýshylaryn qoldaý maqsatynda bıylǵy úzdik túlekke ýnıversıtet granty berilmek. «Ýnıversıtettiń sheshimine sáıkes, Temirbekov mektebiniń bıylǵy úzdik túlegine M.Áýezov ýnıversıtetiniń granty beriledi. Grant ıesi bakalavrıat deńgeıinde 4 jyl tegin bilim alady. Talapker mádenıet jáne óner fakýltetiniń bilim berý baǵdarlamasyn tańdaı alady. Bul – professor Temirbekovtiń salyp ketken sara jolynyń zańdy jalǵasy. О́ıtkeni professor Temirbekov óz zamanynda oqýǵa qushtar, bilimge talapty jastardy qoldap, jaǵdaı jasaǵan. Biz de osy tamasha dástúrdi buzbaı Temirbekov mektebiniń túlegine qoldaý retinde oqý grantyn tabystaımyz», dedi M.Áýezov atyndaǵy Ońtústik Qazaqstan ýnıversıtettiń rektory Darııa Qojamjarova.
– Kópshilikke Sádýaqas atam iri memleket qaıratkeri jáne belgili ǵalym, al bizge, nemereleri úshin ár ýaqytta ynta-yqylasymyzdy qoldaıtyn, aq batasyn berip, jol silteıtin asqar taý edi. Nemereleriniń tulǵa bolyp qalyptasýyna Sádýaqas atam men Farıda apamyzdyń keńpeıildiligi men balajandy jarqyn beınesi kóp áser etti, – deıdi ǵalymnyń nemeresi, ekonomıka ǵylymdarynyń kandıdaty Janar Temirbekova.
Túrkistan oblysy