Túrkııanyń Ulttyq Qorǵanys mınıstrligi MKE qorǵanys kompanııasyndaǵy jarylystan qyzmetkerler qaza tapqanyn rastady, dep habarlaıdy Egemen.kz Anadoly agenttigine silteme jasap.
Ankara provınsııasynyń Elmadaǵy aýdanynda ornalasqan zymyran tehnıkasy men jarylǵysh zat shyǵaratyn MKE («mashına jáne hımııa ónerkásibi») zaýytynda jarylys bolǵan. Oqys oqıǵadan bes qyzmetker kóz jumdy. Bul týraly búgin Túrkııanyń Ulttyq Qorǵanys mınıstrligi habarlady.
Vedomstvo 10 maýsym kúni tańerteń bolǵan qaıǵyly oqıǵaǵa baılanysty ákimshilik tergeý bastalǵanyn atap ótti. Jaǵdaıdy quqyq qorǵaý organdary zerttep jatyr.
Zaýyt qyzmetkerleriniń jaqyndary kásiporynnyń aldyna jınalyp, qandaı da bir habar kútip tur.
Zardap shekken biraz jumysshy jedel járdem kóligimen tóńirektegi aýrýhanalarǵa jetkizilgen. Keıbiriniń jaǵdaıy aýyr ekeni habarlandy.