QR TJM usynǵan derekke sáıkes, bıylǵy shomylý kezeńi bastalǵaly beri elimizde 59 adam sýǵa batyp ketken, onyń 19-y bala. Sýǵa batqandardyń kóbi úsh óńirde tirkelgen, dep habarlaıdy Egemen.kz.
Shomylý maýsymy bastalǵaly beri sý aıdyndarynda 49 adam, onyń ishinde 16 bala qutqaryldy. Bul rette júrgizilip jatqan profılaktıkalyq jumystarǵa qaramastan, shomylý kezeńiniń basynan 59 adam sýǵa batyp ketti, onyń ishinde 19 bala bar. Sýǵa batqandardyń kóbi Almaty, Aqtóbe jáne Aqmola oblystarynda tirkelgen.
Qazaqstanda shomylý jáne demalý úshin paıdalanatyn 50 myńnan astam sý aıdyny bar. Jyl basynan beri sýda 103 adam qutqaryldy, onyń ishinde 43 bala bolǵan. Dálirek aıtsaq, 85 adam TJM, 16 adam kýágerlermen, 2 adam polısııa kúshimen qutqaryldy.
«Búgingi kúni el boıynsha 612 shomylýǵa ruqsat etilgen oryn anyqtaldy, onyń 167-si kommýnaldyq jáne 445-si jeke jaǵajaılar. 3 757 oryn shomylýǵa tyıym salynǵan oryndar dep tanyldy. Jyl basynan beri jergilikti atqarýshy organdar osy oryndarda 2 808 tyıym salý belgilerin ornatty, osy baǵyttaǵy jumys jalǵasyp jatyr», delingen QR TJM baspasóz qyzmeti habarlamasynda.
Mınıstrlik ókilderiniń málimetinshe, kúndelikti reıdter barysynda 2 702 buzýshy ákimshilik jaýapkershilikke tartylǵan.