Jambyl oblysy Shý aýdany Belbasar aýylynyń mańyndaǵy qumdy aımaqta ornalasqan «Sarǵaý» ýchaskesinde asa iri mólsherde esirtki zatyn saqtady degen kúdikke ilingen 42 jastaǵy jergilikti turǵyn ustaldy, dep habarlaıdy Egemen.kz.
Kúdikti ustalǵan ýchaskeden jalpy salmaǵy 237 keli 234 gramm esirtki, qarasora butalary tabylyp, tárkilendi. Oǵan qosa, kúdiktiniń turǵylyqty jeri boıynsha jalpy salmaǵy 12 keli 640 gramm keptirilgen marıhýana salynǵan polıpropılen qapshyq pen jalpy salmaǵy 24 keli 586 gramm gashısh esirtki zaty tabyldy.
«Ustalǵan azamat kinásin moıyndap, Shý aýdanynyń ýaqytsha ustaý ızolıatoryna qamaldy. Qazirgi ýaqytta osy derekke qatysty QR QK-niń 297-babynyń 3-bóligi (Esirtki zattaryn asa iri mólsherde ótkizý maqsatynda zańsyz saqtaý) boıynsha sotqa deıingi tergeý amaldary bastaldy. Kúdiktige qatysty múlki tárkilenip, on jyldan on bes jylǵa deıingi merzimge bas bostandyǵynan aıyrý túrindegi jaza qarastyrylady», dedi polısııa departamenti esirtki qylmysyna qarsy is-qımyl basqarmasynyń bastyǵy Álim Bajyqbaev.