Bul týraly Aqparat jáne qoǵamdyq damý mınıstri Darhan Qydyráli Túrkistanda ótken balalarǵa qatysty zorlyq-zombylyq taqyrybyndaǵy dóńgelek ústelde aıtty, dep habarlaıdy Egemen.kz.
Vedomstvo basshysynyń sózinshe, mınıstrlikke qarasty Qazaqstandyq qoǵamdyq damý ınstıtýtynyń Otbasyndaǵy zorlyq-zombylyqtyń aldyn-alý jónindegi 2023 jylǵy ótkizilgen jappaı saýalnamasynyń nátıjesinde otbasyndaǵy zorlyq-zombylyqtyń saldary retinde birinshi orynda jaman ádetter (alkogolızm, nashaqorlyq, oıyndarǵa qumarlyq) turǵanyn atap ótýge bolady. Respondetterdiń jartysynan kóbi osyndaı jaýapty tańdaǵan (55,3%).
«Sondyqtan kúrdeli máseleler bir-birimen jeń ushynan jalǵasyp jatyr jáne ony mınıstrlik te jan-jaqty zerdelep, óz quzireti boıynsha tıisti shara qabyldap keledi», dedi mınıstr.
Atap aıtqanda, 2023 jyly Aqparat jáne qoǵamdyq damý mınıstrliginde harassmentten qorǵaý jóninde arnaıy buıryq shyǵaryldy.
Dóńgelek ústelde mınıstrlik QQDI daıyndaǵan «Balalarǵa qatysty zorlyq-zombylyqtyń aldyn-alý jónindegi nusqaýlyqty» usyndy. Nusqaýlyq statıstıkalyq derekterdi, qylmyskerdiń kelbetin, ata-anaǵa keńester men kórshi, týys pen kýágerge degen usynysty qosa alǵanda, osy salaǵa baılanysty negizgi aspektilerdi qamtıdy.
Darhan Qydyráli bıyl Qoǵamdyq damý ınstıtýtynyń sarapshylary «Balalar máselesin BAQ-ta qalaı qaýipsiz jarııalaýǵa bolady?» degen taqyrypta praktıkalyq nusqaýlyqty jarııalaǵanyn aıtty. Bul – balalar taqyryby týraly jazatyn medıa mamandarǵa taptyrmas metodıkalyq qural.
Odan bólek Túrkistandaǵy jıynǵa Qazaqstan ulttyq arnasy túsirgen derekti fılm kórsetildi. Fılmde balalar arasyndaǵy zorlyq-zombylyq problemasyna beı-jaı qaramaıtyn, tájirıbeli mamandardyń pikiri berilgen.
«Qoǵamdaǵy zorlyq-zombylyqqa qatysty alańdaýshylyqty negizge ala otyryp, onyń aldyn alý jáne qarsy mádenıetti qalyptastyrý maqsatynda «Zorlyq-zombylyqqa qarsy 30 kún» atty aksııa ótkizýdi josparlap otyrmyz. Oǵan da barshańyzdy birlese atsalysýǵa shaqyramyn», dedi Darhan Qydyráli.