Bul kúnniń basty keıipkeri de, emosııasyna erik bergeni de balalar boldy. Birneshe kún eresekter aldynda óner kórsetýge daıyndalǵan daryndar da bul kúndi umytpas. Iá, aıtaıyn degenimiz Keles aýdany Birlesý aýyldyq okrýginiń 28 gvardııa aýylynda jeke kásipkerdiń demeýshiligimen 145 oryndy balabaqshanyń ashylǵany edi.
«Alı-Sultan KZ» bóbekjaı-balabaqshasynyń qurylysy aldyńǵy jyly bastalǵan bolatyn. Jobanyń jalpy quny – 110 mln teńge. «Memleket basshysy Qasym-Jomart Toqaev Qazaqstan halqyna arnaǵan Joldaýynda balalardyń mektepke deıingi jan-jaqty damý máselesin sheshý qajettigin aıtyp, 2025 jylǵa qaraı 6 jasqa deıingi balalardy mektepke deıingi tárbıemen jáne oqytýmen 100 paıyz qamtamasyz etýdi mindettegen bolatyn. Atalǵan mindetti oryndaý baǵytyndaǵy irgeli ister aýdanymyzda sátti júzege asyrylyp keledi. Sonyń dáleli – búgin ashylǵan balabaqsha. Bul rette balǵyndardyń baqytty bolashaǵyna qamqorlyq tanytyp demeýshilik jasap otyrǵan azamattarǵa alǵysymyz sheksiz», dedi bóbekjaı-balabaqshanyń ashylýyna qatysqan Keles aýdany ákiminiń orynbasary Súleımen Jylqybaev.
«Alı-Sultan KZ» bóbekjaı – balabaqshasy 2-6 jas aralyǵyndaǵy 6 topqa búldirshinderdi jınaqtap, 25 adam jumyspen qamtylatyn bolady. Jalpy oblys boıynsha 1381 mektepke deıingi uıym bar. Odan bólek mektepterde 5-6 jastaǵy mektepaldy toptarda 34056 bala tárbıelenýde. Iаǵnı qamtý kólemi 98,5% bolyp otyr. Qazirgi tańda mektepke deıingi bilim berý uıymdarynyń 77,1%-y – jekemenshik. Al Keles aýdany boıynsha 97 balabaqsha bar. Onyń 12-si memlekettik, 85-i jekemenshik bolyp tabylady. Bul balabaqshalarda 10 615 bala tárbıelenýde.
Aıta ketelik, Respýblıka kúnine oraı oblystaǵy aýdan-qalalarda 17 áleýmettik mańyzdy nysan ashylady. Olardyń qatarynda Ordabasy aýdanynda jekemenshik «Uly Orda» mektebi, Jetisaı aýdanynda fýtbol alańshasy, Saryaǵash aýdanynda dárigerlik ambýlatorııa, Shardara aýdanyndaǵy mádenıet úıi syndy nysandar bar.
Túrkistan oblysy