Maral ıshannyń Quran kitaby kesenege qoıyldy

«Ke­zinde Taıqazannyń elge oralýyn jurt jaqsy yrymǵa balaǵan edi. Kóp uzamaı Qazaqstan Táýelsiz memleket boldy. Ult azattyǵy úshin kúresken Kenesarynyń qo­lynda bolǵan Quran kitabynyń elge kelýi de jaqsy yrym dep oılaımyn. Bul oqıǵa Qazaqstannyń jańa dáýiriniń berekeli bastaýy bolsyn dep tileıik», dedi Pre­zıdent Ulttyq quryltaıda. Endi, mine, Prezıdent bastamasy iske asyrylyp, qundy jádiger kesenege qoıyldy.

Quran kitapty Qoja Ahmet Iаsaýı kesenesine tapsyrý is-sha­ra­­­syna Túrkistan oblysynyń áki­mi Darhan Satybaldy, Qazaq­stan musylmandary dinı basqar­masy­nyń tóraǵasy, bas múftı Naý­ryzbaı qajy Taǵanuly, Kene­sary hannyń urpaqtary, zııaly qaýym qatysty. «Qazaqtyń 21 hany, sultandary men batyrlary jer­lengen Qoja Ahmet Iаsaýı kese­nesine osyndaı sırek jádigerdi ákelý – biz úshin úlken mártebe, maqtanysh. Bul – elimizdiń rýhyn kóteretin oqıǵa ekendigi anyq», dedi oblys ákimi. Al Naýryzbaı qajy Taǵanuly qundy jádigerdi Qazaqstan musylmanda­ry dinı basqarmasy osy jyldyń maý­sym aıynda qabyldap alǵa­­nyn, Ma­ral ıshannyń tek dindar ǵana emes, qoǵam qaıratkeri ekenin aıtyp ótti. «Qundy jádigerdiń Qoja Ah­met Iаsaýı babamyzdyń kese­ne­si­ne qoıylýy dástúrli dinimizdiń már­tebesiniń artyp, halqymyzdyń sa­nasynyń izgilikke ózgerýine yqpal etedi degen oıdamyz. Maral ıshan ba­ba­myz kim degende, biz ony tek din­dar ǵana emes, qoǵam qaıratkeri, azat­tyq úshin kúresken tulǵa retin­de tanýǵa tıispiz. Babamyz patsha úkimetiniń qazaq jerinde jasaǵan ádiletsizdikterine qarsy turyp, el­di jumyldyryp, ultty saqtaýda umytylmas ulaǵatty ister atqar­dy. Maral ıshannyń aǵartýshylyq qyzmeti bir tóbe. Biz de búgin qun­dy murany handar men bıler, sul­tandar men rýhanı ustazdardyń qııametke deıingi máńgilik turaǵy bolǵan kıeli mekenge alyp keldik. Álemniń ár qıyrynan Túrkistanǵa keletin kez kelgen adam úshin bul taǵylymy mol, bereri kóp tarıhı dúnıe», dedi bas múftı. Máde­nıet jáne aqparat mınıstrligi Din isteri komıtetiniń tóraǵasy Erjan Núkejanov ta jádigerdiń mańy­zy­na toqtaldy.

Rýhanı is-sharada ǵulama ­qarı­lar Quran hatym túsirdi. Bas múf­tı Quran kitapty «Áziret Sul­­tan» memlekettik tarıhı-má­de­nı mý­zeı-qo­ryǵynyń dırek­­tory Máý­­len Sa­dyqbekovke tap­­sy­ryp, ol Úl­ken Aqsaraı ból­me­sindegi ­arnaıy da­ıyndalǵan só­rege ornatyl­dy. Eki ǵasyr boıy qoldan-qolǵa ótip, ta­rıhı otany­na jetken kıeli kitap­­ta Kenesary hannyń móri bar. Otan­dyq jáne sheteldik ǵalymdar mu­qııat zerttep, Qurannyń Ma­ral ıshan­ǵa tıe­sili bolǵanyn jáne Ke­ne­­sary han­ǵa berilgenin anyq­taǵan.

TÚRKISTAN