Qarjy mınıstrligi Bıýdjettik kredıtteý, Qazaqstan Respýblıkasynyń Ulttyq qory jáne qarjy sektory máseleleri boıynsha ózara is-qımyl departamenti dırektory Aıbol Arǵynǵazınov BAQ-pen kezdesýde «Ulttyq qor - balalarǵa» jobasynyń iske asyrylý barysy týraly aıtyp berdi, dep habarlaıdy Egemen.kz.
Departament dırektorynyń aıtýynsha, Ulttyq qor tólemin aýdarý bala qaıtys bolǵan jaǵdaıda toqtatylady.
«Bul jaǵdaıda muragerlik quqyǵy kúshine enedi. Ondaı balanyń murageri kim bola alatyny Azamattyq kodekstiń aıryqsha bóliginde kórsetilgen. Iаǵnı, ár balanyń murageri naqty jaǵdaıy boıynsha anyqtalady. Balany joǵaltý ata-ana úshin óte aýyr qaıǵy ekenin túsinemiz. Sondyqtan ol aqshany naqty bir maqsatqa paıdalaný kerek degen talap qoımaımyz. Iаǵnı, ata-ana bolsyn, zań aıasyndaǵy basqa da muragerlik quqyǵyna ıe adam bolsyn, qaıtys bolǵan baladan qalǵan Ulttyq qor aqshasyn óz qalaýyna qaraı paıdalana alady. Sondaı-aq bala Qazaqstan azamattyǵynan aıyrylǵan kezde Ulttyq qor tólemin aýdarý toqtatylady», dedi Aıbol Arǵynǵazın.
Memleket basshysy Qasym-Jomart Toqaevtyń 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda aıtylǵandaı «Ulttyq qordyń jyl saıynǵy ınvestısııalyq tabysynyń 50 paıyzy balalardyń arnaýly jınaqtaýshy esepshotyna aýdarylady. Qarjy ár bala 18 jasqa tolǵanǵa deıin aýdarylyp turady, ony merziminen buryn esepshottan shyǵaryp alýǵa bolmaıdy. Jınaqtalǵan qarjy balalar kámelet jasyna tolǵannan keıin olardyń baspana nemese bilim alýyna jumsalatyn bolady.
Memleket basshysy 2024 jylǵy 1 qantardan bastap qúshine enetin «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Ulttyq qorynan balalarǵa arnalǵan qarajatty esepteý, tóleý jáne paıdalaný máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna 2023 jylǵy 16 qarashada № 40-VIII QRZ qol qoıdy.
«2024 jyly 18 jasqa deıingi balalarǵa Ulttyq qordyń 2005-2022 jyldardaǵy ortashalanǵan kiristiligin eskere otyryp qarajat esepteletin bolady. Bala 18 jasqa tolǵanǵa deıin eseptelgen qarajat is júzinde Ulttyq qorda saqtalady jáne Qazaqstan Respýblıkasynyń Ulttyq banki ınvestısııalaýdy jalǵastyrady. Ulttyq qorda jınaqtalǵan qarajatty paıdalaný bala 18 jasqa tolǵan kezde júrgiziledi. Bul jınaqtar kámeletke tolǵan adamnyń erekshe menshigi bolyp tabylady, ol qarajatty (bilim alýǵa nemese turǵyn úı jaǵdaıyn jaqsartýǵa) qalaı paıdalaný kerektigin ózi (derbes) sheshedi. Bul rette sheteldik oqý ornynda oqýǵa aqy tóleýge arnalǵan qarajatty paıdalanýǵa shekteýler joq», dedi Aıbol Arǵynǵazınov.