Batys Qazaqstan oblysynda Rojkov gaz kondensatty ken orny ónerkásiptik paıdalanýǵa berildi. Osy oqıǵaǵa oraı ótken beısenbi kúni kenish basynda saltanatty jıyn boldy.
2023 jyly 21 jeltoqsanda «Oral Oıl end Gaz» JShS Batys Qazaqstan oblysynda Rojkov gaz kondensatty ken ornyn ónerkásiptik paıdalanýǵa berdi. Kompanııanyń 50% úlesi «QazMunaıGaz» ulttyq kompanııasy aksıonerlik qoǵamyna tıesili.
О́nerkásiptik paıdalanýǵa berý rásimine Qazaqstan Respýblıkasynyń Premer-mınıstri Álıhan Smaıylov, MOL Group kompanııasynyń barlaý jáne óndirý jónindegi atqarýshy vıse-prezıdenti Jombor Marton, Sinopec International Petroleum Exploration & Production Corporation kompanııasynyń basqarma tóraǵasy Go Iýelıan beınebaılanys rejiminde qatysty. Ken ornyn Batys Qazaqstan oblysynyń ákimi Narıman Tóreǵalıev, «QazMunaıGaz» UK» AQ Basqarma tóraǵasy Maǵzum Myrzaǵalıev, MOL Group Reseı/ Qazaqstan bas dırektory Evgenıı Lapshın jáne First International Oil Corporation Limited (Sinopec kompanııasynyń enshiles kásiporny) kompanııasynyń vıse-prezıdenti Chjao Venmın iske qosty.
Ken ornynda jylyna shamamen 1 mlrd tekshe metr gaz, 500 myń tonnadan asa kondensat óndirý múmkindigi bar. Al suıytylǵan kómirsýtekti gaz óndirisiniń deńgeıi 150 myń tonnaǵa jetedi. Ken ornynan alynǵan shıki gaz «Jaıyqmunaıgaz» JShS gaz óńdeý kásipornyna beriledi. О́ńdelgen taýar gazy ishki naryqqa jetkiziledi.
«Rojkov» tabıǵı gaz kóleminiń qosymsha kózine aınalady. Ken ornynda óndiriletin shıkizat «Jaıyqmunaıgaz» kompanııasynyń káspornynda óńdeledi. Joba sheteldik seriktestermen birlese júzege asyrylady, bul olardyń tájirıbesin qajetti jobalyq sheshimderdi ázirleý men engizý kezinde qoldanýǵa múmkindik berdi», dep atap ótti Á.Smaıylov.
«Byltyr qazan aıynda energetıka salasyn damytý jónindegi keńeste Memleket basshysy taýar gazy óndirisiniń kólemin arttyrýdy tapsyrdy. Biz bıyl mamyr aıynda Ońtústik Aqsaı ken ornyn, jeltoqsan aıynyń basynda Shyǵys О́riktaý ken ornyn iske qostyq, al jyl sońynda Rojkov ken ornyn paıdalanýǵa berip otyrmyz. Bul joba Batys Qazaqstan oblysynyń áleýmettik-ekonomıkalyq damýyna yqpal etedi. «Oral Oıl end Gaz» JShS jumysy men qyzmetterine kem degende 74% jergilikti mamandar tartylǵan. Jobaǵa qurylys kezinde 450-den asa adam jumyldyrylsa, 80 turaqty jumys orny ashyldy», dep atap ótti M.Myrzaǵalıev.
«Sinopec kompanııasynyń atynan Rojkov gaz ken ornynda resmı túrde kommersııalyq óndirý jumysynyń bastalýymen shyn júrekten quttyqtaımyn. Qazaqstan Úkimetine jumys barysynda turaqty qoldaý kórsetip kelgeni úshin, sonymen birge operasııalyq kompanııanyń («Oral Oıl end Gaz») basshylaryna atqarylǵan jumys úshin shynaıy rızashylyǵymdy bildiremin», dep atap ótti Go Iýelıan.
«Biz Qazaqstan men Majarstan úkimetiniń MOL kompanııasynyń qazaqstandyq munaı-gaz sektoryndaǵy qyzmetin eki el arasyndaǵy yntymaqtastyqtyń ekonomıkalyq jobalar arasyndaǵy ozyq úlgisi retinde moıyndaǵanyn joǵary baǵalaımyz. MOL jáne «Oral Oıl end Gaz» komandasyna, sondaı-aq seriktesterimizge, eki eldiń úkimetine birlesken jumysy úshin alǵys bildiremin», dep atap ótti Jombor Marton.
«Oral Oıl end Gaz» JShS úleskerleri – «QazMunaıGaz» UK» AQ (50%), Majarstannyń MOL Caspian Oil and Gas Plc. (27,5%) kompanııasy jáne Qytaıdyń First International Oil korporasııasy (22,5%).
Gaz kondensaty ken orny 2008 jyly keń aýqymdy geologııalyq barlaý jumystarynyń nátıjesinde ashyldy. 2040 jylǵa deıin munda 14,2 mlrd tekshe metr shıki gaz jáne 7,1 mln tonna kondensat óndirý josparlanyp otyr. Búgingi tańda shamamen 534 mln dollar ınvestısııalandy.
«Rojkovskoe» ken ornyn ıgerý arqyly Qazaqstan Respýblıkasynyń Ulttyq qory 501 mlrd teńgege, jergilikti bıýdjet 110 mlrd teńgege tolyǵady dep kútilýde. Budan basqa aksıonerler óńirdiń áleýmettik-ekonomıkalyq damýyna keminde 3,1 mlrd teńge bólýdi, sondaı-aq jyl saıyn kelisimsharttaǵy mindettemeler aıasynda qazaqstandyq kadrlardy oqytýǵa ınvestısııalar somasynyń 1%-yn arnaýdy josparlap otyr.
«Jańa kásiporyn óńirdegi gazǵa degen tapshylyqty joıady. Osyǵan deıin suıytylǵan gazdy Aqtóbe oblysynan tasymaldap kelsek, endi óz óńirimizde gaz suranysy tolyq qamtylady», dedi óńir ákimi N.Tóreǵalıev.
M.Myrzaǵalıevtiń aıtýynsha, jańa óndiris orny ozyq tehnologııalarmen, jańa tehnıkamen jabdyqtalǵan. Jobanyń órkendeýine, qarqyndy damýyna barlyq múmkindik bar.
«QazMunaıGaz» Memleket basshysy Qasym-Jomart Toqaevtyń munaı men gazdyń jańa ken oryndaryn ashý jónindegi tapsyrmasyn oryndap, elimizdi kógildir otynmen qamtamasyz etýge úles qosyp keledi. Bul joba – júzdegen adamnyń, kásibı mamandardyń mańdaı ter eńbeginiń jemisi. «QazMunaıGaz» ulttyq kompanııasy aldaǵy ýaqytta da ózine júktelgen jaýapkershilikti laıyqty atqaryp, el ıgiligine jumsalatyn jobalardy jalǵastyrady», deıdi «QazMunaıGaz» UK» AQ Basqarma tóraǵasy.
Batys Qazaqstan oblysy