Oblys baspasóziniń qarashańyraǵy sanalatyn «Ońtústik Qazaqstan» qoǵamdyq-saıası gazeti ǵasyr boıy óńirdiń shejiresin jazyp keledi. Basylymnyń mereıtoıyn atap ótý maqsatyndaǵy is-sharalar aıasynda Túrkistanda «Eskirmeıtin estelik» fotokórmesi uıymdastyryldy.
«Kongress holl» kesheninde ótken fotokórmeniń ashylý saltanatynda oblys ákiminiń orynbasary Beısen Tájibaev tarıhy ótken ǵasyrdan bastalatyn gazettiń mańyzy erekshe ekenin atap ótti.
«Ultymyzdyń birtýar arystary qalam terbegen tarıhı basylym búginde ıgi isterdiń, jetistikterdiń jarshysy bolyp keledi. Gazettiń 100 jyldyǵy aıasynda aýqymdy, taǵylymy mol is-sharalardy kóptep ótkizý josparlanyp otyr. Bıyl osynaý mereke aıasynda jyl kóleminde oblystyq, respýblıkalyq deńgeıde birqatar is-sharany ótkizemiz», dedi Beısen Dáýletuly. Al «Ońtústik Qazaqstan» oblystyq qoǵamdyq-saıası gazetiniń dırektor-bas redaktory Abaı Balajan basylymnyń ǵasyrlyq tarıhyna toqtaldy. Fotokórmeniń mán-mańyzy jaıly áńgimeledi. «Tunba bastaýyn «Aq jol» gazetinen alatyn bul basylymdy shyǵarýǵa Sultanbek Qojanov, Turar Rysqulov, Mirjaqyp Dýlatuly, Názir Tórequlov sekildi ult qaıratkerleri atsalysyp, halyq múddesin kózdeıtin maqalalary men shyǵarmalaryn jarııalap otyrǵan. Odan beride qazaq rýhanııatynyń sózin sóılep, joǵyn joqtaǵan bul gazette Muhtar Áýezov, Júsipbek Arystanov, Beısenbaı Kenjebaev syndy birtýar tulǵalardyń qalamynyń taby qalǵan. О́tken ǵasyrdyń elýinshi-sekseninshi jyldary aralyǵynda da «Ońtústik Qazaqstan» gazeti óz muratynan aınymaı, keńestik senzýraǵa qaramaı salt-dástúrimizdi, tarıhymyzdy, tilimizdi, dilimizdi keıingi urpaqqa jetkizý, rýhanııatymyzdy saqtap qalý jolynda talmaı qyzmet etti. Gazetke sol jyldary redaktorlyq jasaǵan, redaksııada qyzmet etken aǵa býyn ókilderiniń barlyǵy osy jolda ter tógip, ult úshin qyzmet etti. Elimiz táýelsizdik alǵannan keıin de gazet sol soqpaqty ári qaraı jalǵastyryp, egemen elimizdiń saıası turaqtylyǵyn saqtaý, oblys ekonomıkasy men mádenıetin damytý jolynda mańyzdy ról atqaryp keledi», dedi Abaı Beknazaruly.
Fotokórmede basylymnyń ár jyldardaǵy tarıhy fotosýretter arqyly kórermen nazaryna usynylyp otyr. Munda tek redaksııa ujymynyń ǵana emes, búkil ońtústik óńirdiń tarıhynda ózindik orny bar tulǵalardy tabýǵa bolady. Sondaı-aq kórmege «Ońtústik Qazaqstan» gazetiniń fototilshisi Qaısar Sherimniń jeke shyǵarmashylyǵynan alynǵan týyndylar da qoıylǵan.
TÚRKISTAN