«Anashym, men ósken soń sizge kıim tigetin mashına alyp beremin», deıdi jeti jasar Qazyna baısaldy túrde. «Men kóılek tigip beremin, ádemi, qyzyl oıýy bar. Siz sondaı kóılekti jaqsy kóresiz ǵoı», deıdi Áppaǵy erkeleı anasynyń moınyna asylyp. «Al men ákeme kó-ó-ó-p aqsha beremin, ol úlken úı salyp beredi», deıdi salmaqty keıipte Nurgúli. Qyzdarynyń armandaı aıtqan sózderine kóńili bosaǵan ana ishteı «áýmın» dep, oramalynyń bir ushyn kózine apardy...
Analarynyń ne qalaıtynyn bilip, kókeıine túıip júrgen balalarynyń armany – oryndalmaıtyn dúnıe emes. Ony ul-qyzynyń amandyǵyn, qatarynan qalmaı ósip bilimdi de eńbekqor, adal azamat bolýyn tilep, bar jaǵdaıyn jasap júrgen kópbalaly Janar ana jaqsy biledi.
Búginde 4 ul, 8 qyzdy dúnıege ákelip, ósirip-tárbıelep otyrǵan Janar Ábsamatqyzynyń kishkentaı qyzdaryna aıtpaı júrgen kishigirim taǵy bir armany bar. Ul-qyzdary armandaǵandaı baspanaly bolsa, esiginiń aldyna gúl egip, alystan kóz qyzyqtyrar ádemi ete aýlasyn abattandyrǵysy keledi. Muny bálkim, arman deýge de bolmas, jaqyn arada oryndalatyn jospar dersiz.
Iá, on eki balanyń anasy Janar Áljanovanyń armany – ázirge áleýmettik, ıaǵnı turmystyq deńgeıde. Otaǵasy Nurbol men Janar ul-qyzdarymen, ıaǵnı 14 jan Túrkistan oblysy Ordabasy aýdany Shubar aýylynda jaldamaly úıde turady. Báıdibek aýdanynyń Jolǵabas aýylynda 1981 jyly dúnıege kelgen Janar mektep bitirgen soń, tiginshilikti meńgeripti. Al turmysqa 24 jasynda shyqqan. Otaǵasy Nurbol Málikuly Shymkenttegi «Bal bereke» balabaqshasynda kúzetshi. Tuńǵysh qyzdary Nuraıym ótken jyly sáýirde Túrkistan qalasyna turmysqa shyqqan. Qyzdan keıingi ul Nurdáýlet Shymkent qalasynda oqıdy. Al Ernur men Arnur Shubardaǵy №18 kolledjinde biri dánekerleýshi, biri operator mamandyqtarynda bilim alyp júr. Kúnsulý, Symbat, Zere, Meıirjan men Qazyna mektepte bolsa, Áppaq, Nurgúl men Aqqýnaz – aýyldaǵy «Aıana» balabaqshasynda. Kópbalaly otbasynan shyqqan qyzdardy balabaqsha meńgerýshisi Seıdana Bedebaeva tegin qamqorlyǵyna alǵan.
Mamandyǵy tiginshi Janar ul-qyzdarynyń úıde kıer kıimin ózi tigip beredi. Árıne, qolmen. О́ıtkeni tigin mashınasy joq.
«Tiginshilikpen aınalyspaımyn, qajetti tehnıkam joq. Biraq ul-qyzdaryma kerek kıimderdiń keıbirin qolmen tigemin. Keıde shalbardyń nemese kóılektiń qaıtarylǵan jerlerindegi tigis birkelki, tegis shyqpaı qalady. Sol kezde oıý salyp bildirmeı jiberemin, áıtpese balalardyń da talǵamy bar, kımeı qoıýy múmkin», deıdi Janar ana.
Kópbalaly ananyń aýyl ákimine aıtar alǵysy da mol. Sebep te joq emes. Úsh jyl boıy túrli sebeppen járdemaqy ala almaı, qatty qınalǵan. Aýyl ákimi Murat Elshibek zańdyq turǵyda barlyq kómekti kórsetip, jýyrda ǵana járdemaqyǵa qoly jetken.
«Balalardyń járdemaqysy bar, otaǵasynyń azyn-aýlaq tapqan tabysy bar, áıteýir kóppen birge tirshilik etip jatyrmyz. О́zimniń anam da 8 ul-qyzdy dúnıege ákelgen. Kópbalaly otbasynda tárbıelendik. Ul-qyzdarym aman, qatarynan qalmaı ósip, tálim-tárbıe alyp jatyr. Bar baılyǵymyz – solar, árbiriniń óz nesibesi bar. Ul-qyzdardyń kóbin jyl aralata jaryq dúnıege ákeldim. Oǵan otaǵasy ekeýmiz qınalǵan da, ókingen de emespiz. Qaıta árbiri dúnıege kelgen saıyn qýanysh syılap, ózimizdi baqytty sezindik. Aýyl ákimine, balabaqsha meńgerýshisine rahmet, jaǵdaıymyzdy surap kómek kórsetti. Qyzdardyń biri 12 jastaǵy Symbatymyz dombyra úıirmesine qatysyp júr. Ulttyq aspapty meńgerýine jaǵdaı jasap, tegin úıretip júrgen Farıza apaıǵa da aıtar alǵysym sheksiz. Úı alýǵa kezekte turmyz, 134-shi edim, qazir ekinshimiz. Alla násip etse, baspanaly da bolarmyz. Tek uzaqqa sozylmasa eken. Úı alsam, aýlasyn abattandyryp, baý-baqsha ósirsem deımin. Balalardy eńbekke baýlyp, ózimizdiń kókónis, jemis-jıdegimizdi jesek deımin. Eń basty armanym – baspanaly bolý», deıdi J.Áljanova.
Kópbalaly ananyń barlyq armanynyń oryndalýyna tilektestik bildirdik. Qoshtasarda ul-qyzdarynyń tegin suraǵanbyz. «Atamnyń atyn ataı almaımyn ǵoı, qazir qujattaryn kórseteıin», dedi Janar ana. On eki ul-qyzdyń tegi – Málikzat.
Túrkistan oblysy