SQO PD esirtki qylmysyna qarsy is-qımyl basqarmasynyń qyzmetkerleri sıntetıkalyq esirtki zattaryn taratty degen kúdikke ilingen eki áıeldi ustady, dep habarlaıdy Egemen.kz.
Olardyń biri – 33 jastaǵy kelinshek. Anyqtalǵandaı, 2022 jyldyń qyrkúıek aıynda onyń kúıeýi osyǵan uqsas qylmys jasaǵany úshin sottalyp, qazir bas bostandyǵynan aıyrý oryndarynda jazasyn ótep jatyr.
Áıeldiń janynda bolǵan 36 jastaǵy qurbysy da ustaldy. Ustalǵandardy jáne olardyń turǵylyqty mekenjaılaryn tintý kezinde 700 gramnan astam untaq tárizdi jáne kesektelgen zat tárkilendi. Saraptama nátıjesine sáıkes, bul tuz degen ataýmen belgili α-PvP sıntetıkalyq esirtkisi bolyp shyqty.
Sondaı-aq esirtkini býyp-túıýge arnalǵan zattar tárkilendi. Atalǵan fakti QR Qylmystyq kodeksiniń 297-babynyń 3-bóligi boıynsha Sotqa deıingi tergep-tekserýlerdiń biryńǵaı tizilimine tirkeldi.
«Esirtkini asa iri kólemde ótkizý úshin 10 jyldan 15 jylǵa deıingi merzimge bas bostandyǵynan aıyrý jazasy kózdelgenin eske salamyz. Qazirgi ýaqytta 33 jastaǵy qala turǵyny qamaýǵa alyndy, tergeý júrip jatyr. Kelip túsken aqparatqa sáıkes kúdiktiler bul qylmystarymen 4 aıǵa jaqyn ýaqyt aınalysqan», dedi SQO PD EQQIQB bastyǵy Rýslan Saparov.