О́skeleń urpaqtyń oqý saýattylyǵyn, oqý belsendiligin arttyrý, otbasylyq kitap oqý dástúrin jańǵyrtý maqsatynda Memleket basshysy Qasym-Jomart Toqaev Ulttyq qoǵamdyq senim keńesiniń IV otyrysynda kitap oqý arqyly álemge degen qyzyǵýshylyq mektepten qalyptasýǵa tıis ekenin aıtqan bolatyn. Osy oraıda «Oqýǵa qushtar mektep – oqýǵa qushtar ult» jobasy aıasynda «KitapHAN» kitap oqytý ádisi uıymdastyrylyp, onyń jyldyq qorytyndysy Túrkistan qalasyndaǵy «Aqjaıyq» mýzyka mektebinde ótti.
Jobanyń aptalyq, aılyq kezeńderiniń úzdikteri jyldyq fınalǵa shyǵyp, «KitapHAN» jeńimpazy anyqtaldy. Oblysta kitap oqý saıysyna jalpy 1000 mektep ishinen 80 myń muǵalim, jarty mıllıon oqýshy qatysyp, sonyń ishinde aqtyq márege 21 úmitker joldama utyp aldy. Fınaldyq kezeńde irikteýden ótken qatysýshylar belgili aqyn-jazýshylardyń eńbekterinen úzindi oqyp, qoǵamda kitap oqýdyń mańyzyna erekshe mán berdi. Sondaı-aq ózderi oqyǵan kitabyn 7 mınýtta qorǵap, nátıjesin bólisti. Baıqaýda basshylyq quram arasynan Tólebı aýdany Q.Sátbaev atyndaǵy jalpy bilim berý mektebiniń dırektory Lazzat Sandybaeva, al ustazdar arasynan Arys qalasy Jıdeli jalpy bilim berý mektebi fızıka pániniń muǵalimi Nursulý Alysheva, oqýshylar arasynan Otyrar aýdanyndaǵy S.Áshirbekov atyndaǵy jalpy bilim berý mektebiniń 9-synyp oqýshysy Tańsholpan Qaldybaı «KitapHAN» jeńimpazy atandy.
Fınalǵa shyqqan barlyq úmitkerge Túrkistan oblysy bilim jáne ǵylym qyzmetkerleriniń jergilikti kásiptik odaǵynyń demeýshiligimen qundy, baǵaly syılyqtar tabystaldy. Atap aıtqanda, mektep oqýshylaryna 8 velosıped, 5 mektep dırektory men 8 mektep muǵalimine 13 teledıdar tartý etildi. Belsendilik tanytqandarǵa «Qurmet» gramotasy berildi. Is-sharany oblystyń bilim basqarmasyna qarasty Bilim berýdi damytý ortalyǵy uıymdastyrdy.
Túrkistan oblysy