Túrkistan oblysynda bilim, mádenıet, densaýlyq saqtaý salasyna qajetti nysandar qurylysy júıeli júrgizilip keledi. Árbir aýdan, qalanyń eldi mekenderiniń jaı-kúıi jiti saraptalyp, qolǵa alynǵan qurylys jumystarynyń qarqyny báseńdegen emes.
Bul baǵyttaǵy jumystar talqylanǵan oblys ákimi apparatynyń aptalyq májilisinde bıylǵa josparlanǵan qurylys nysandaryn ýaqtyly ári sapaly aıaqtaý qajettigi aıtyldy. «Árbir qurylys nysanyndaǵy jumystar baqylaýda bolsyn. Qadaǵalańyzdar! Ýaqtyly ári talapqa saı tapsyrylýǵa tıis. Bul nysandar eldiń suranysyna jáne óńirdiń damý josparyna sáıkes salynyp jatyr. Bos ýáde emes, naqty jospar, jumys qajet. Áleýmettik nysandar men turǵyn úıler óńir turǵyndarynyń turmys sapasy men áleýetin kóterýge serpin beredi. Sondyqtan el qazynasyna salynyp jatqan árbir ǵımarattyń qurylysy joǵary jaýapkershilikpen júrgizilýi qajet», dedi oblys ákimi Darhan Satybaldy.
Oblystyq qurylys basqarmasynyń basshysy Toqtar Ýsýbalıevtiń aıtýynsha, basqarma men aýdan, qala ákimdikteriniń tapsyrysymen qolǵa alynǵan bıýdjettik ınvestısııalyq jobalar sany – 485. Onyń 22-si paıdalanýǵa berilgen. Qarjysy tolyq sheshilgen jaǵdaıda jyl sońyna deıin taǵy 396 nysannyń qurylysy aıaqtalsa, 67-si 2025 jylǵa ótpeli. О́ńirde 21 bilim nysanynyń qurylysy qolǵa alynyp, onyń 4-eýi tapsyrylǵan. Jyl sońyna deıin 10 bilim nysany tapsyrylady, 7-eýi kelesi jylǵa ótpeli. Al densaýlyq saqtaý salasynda 94 nysannyń qurylysy josparlanyp, onyń 3-eýi paıdalanýǵa berilgen. Qalǵan 90-yn jyl sońyna deıin tapsyrý maqsatynda jumys kúsheıtilgen. Bul rette «Aýylda densaýlyq saqtaýdy jańǵyrtý» ulttyq jobasy aıasynda 49 joba júzege asyrylyp jatyr. О́ńirde 3 ákimshilik ǵımaraty jyl sońyna deıin el ıgiligine berilmek. Sonymen birge qurylysy júrip jatqan 12 mádenıet nysanynyń 4-eýi bıyl ashylsa, 23 sport nysanynyń 3-eýi paıdalanýǵa berilgen. Jyl sońyna deıin 10 sport nysany beriledi. Qurylys basqarmasynyń tapsyrmasymen júzege asyp jatqan qurylys jumystaryna bıýdjetten 305 mıllıon teńge qaralǵan.
О́ńirde turǵyn úı, ınfraqurylymmen qamtý jumystary da qarqyndy. Bul oraıda 221 úı, 2 469 páterdiń qurylysy júrip jatyr. Mysaly, Jetisaı aýdany turǵyndaryna jyl basynan beri 167 áleýmettik turǵyn úıdiń kilti tabystalǵan. Endi jyl sońyna deıin taǵy 90 páterdiń kiltin tapsyrý josparlanyp otyr. Naqtyraq aıtar bolsaq, búginde Asyqata kentinde 3 qabatty, 54 páterli, Qazybek bı eldi mekeninde 2 qabatty, 16 páterli jáne Sh.Dildábekov aýyldyq okrýginiń Qyzyltań aýylynda 2 qabatty, 16 páterli jalgerlik turǵyn úılerdiń qurylysy júrgizilip jatyr. Qyzyltań eldi mekenindegi 2 turǵyn úıdi «Qurylys Nurtas» JShS salyp jatyr. Mamyrda bastalǵan qurylys jumystary qazan aıynda tapsyrylady dep josparlanyp otyr. Búginde negizgi qurylys jumystary tolyǵymen aıaqtalyp, qajetti ınfraqurylymmen qamtamasyz etilgen. Júrgizilgen jumystardyń sapasyna senimdi bolý maqsatynda otandyq ónimder paıdalanylǵan. Atalǵan turǵyn úılerdiń aýlasynda talapqa saı balalardyń oıyn alańshalary men avtoturaq ta iske qosylady.
Budan bólek, «Jaıly mektep» jobasy aıasynda Asyqata kentinde 900 oryndyq, Jetisaı qalasynda 1500 oryndyq, Yntymaq aýyldyq okrýginde 600 oryndyq mektepterdiń jáne 2 ambýlatorııa men 4 feldsherlik-akýsherlik pýnkt qurylysy júrgizilip jatyr, bir mektep kúrdeli jóndeýden ótedi. Alty mekteptiń jylytý qazandyqtaryn qatty otynnan tabıǵı gazǵa qosý josparlanǵan.
Al Maqtaaral aýdanynda bıyl «Nurly jer» baǵdarlamasy aıasynda 87 áleýmettik baspananyń qurylysy júrip jatyr. Kásipkerlerdiń qarjysyna salynyp jatqan úıler tolyǵymen aıaqtalǵan soń memleket satyp alyp, úı kezeginde turǵan azamattarǵa sanattaryna qaraı, teńdeı bólip bermek. Atalǵan baǵdarlama aıasynda ótken jyly 46 turǵyn úı satyp alynyp, baspanaǵa muqtaj otbasylarǵa berilgen bolatyn. Búginde aýdan kóleminde 2 myńǵa jýyq adam turǵyn úı kezeginde turady. Odan bólek, bıyl aýdanda 2 mádenıet úıi salynyp jatyr.
Túrkistan oblysy