Túrkistan oblysynda qurylys qarqyny báseńdegen emes. О́ńirde ınfraqurylymdy jaqsartý, halyqty baspanamen, áleýmettik nysandarmen qamtý baǵytynda júıeli jumys júrgizilip keledi. О́tken jyly qurylys jumystarynyń kólemi 379,1 mlrd teńgege jetip, ósim 131 paıyzdy qurady. Jyl ishinde 1 035 myń sharshy metr turǵyn úı paıdalanýǵa berildi. Bul aldyńǵy jyldyń tıisti kezeńimen salystyrǵanda 21,3%-ǵa artyq.
Halyqty turǵyn úımen qamtamasyz etý maqsatynda, aýdan, qalalarda arendalyq, ıpotekalyq baspanalar salyndy. Oblysta kezekte turǵan 3 myńnan asa otbasynyń baspana máselesi sheshildi. Táýelsizdik kúni, Jańa jyl merekeleri qarsańynda Túrkistan, Kentaý qalalary men birqatar aýdan turǵyndaryna páter kiltteri tabystaldy. Túrkistanda qala ákimdiginiń tapsyrysymen júrgizilgen «Jibek joly» turǵyn úı kesheni paıdalanýǵa berildi. Ákimshilik-iskerlik ortalyǵynan boı kótergen 5 qabatty 508 páterli arendalyq turǵyn úı baspana kezeginde turǵan azamattarǵa úlestirildi. Jyl basynan beri Túrkistan qalasynda kezekte turǵan 482 otbasyna páterler tabystalǵan bolatyn. Jalpy, jyl qorytyndysynda túrkistandyq 990 otbasy baspanamen qamtamasyz etildi.
Qazirgi tańda Túrkistan qalasynda turǵyn úı kezeginde 16549 adam tur. Qaladaǵy turǵyn úıge muqtaj adamdardy baspanamen qamtamasyz etý maqsatynda 944 páterli 11 turǵyn úıdiń qurylysy júrgizilip, bıyl tabystalady dep josparlanǵan. Saýran aýdanynda 1379 azamat turǵyn úı kezeginde tur. Jaqynda Júınek eldi mekeninde 1 qabatty, 4 páterli 4 úı paıdalanýǵa berildi. Bul joba «Turǵyn úı-kommýnaldyq ınfraqurylymdy damytýdyń 2023–2029 jyldarǵa arnalǵan tujyrymdamasy» aıasynda júzege asyryldy. Atalǵan tujyrymdama aıasynda Shardarada úı kezeginde turǵan 40 otbasy baspanaly boldy. Jańa jyl merekesi qarsańynda Kentaý qalasynda 60 páterli, 3 qabatty turǵyn úı paıdalanýǵa berildi. Búginde qalada memlekettik turǵyn úı kezeginde 4856 azamat tirkelgen. Qala ákimdiginiń málimetine súıensek, 2018–2024 jyldar aralyǵynda kezekte turǵan 1057 azamatqa memleket tarapynan páter berilgen. Budan bólek, qalada kredıttik turǵyn úı salý baǵdarlamasymen 5 qabatty 60 páterli turǵyn úıdiń qurylysy júrgizilip jatyr.
Ordabasy aýdanynda áleýmettik turǵydan osal toptaǵy azamattarǵa arnalyp salynǵan baspanalardyń qurylysy aıaqtalyp, 12 otbasy jańa úılerdiń kiltin aldy. Jańa baspanalar zamanaýı stılde salynyp, aýlalary temir qorshaýmen qorshalǵan. Sý, jylý júıeleri tolyq ornatylǵan. Ár páter 3 bólmeli, jalpy alańy 62,5 sharshy metrdi quraıdy. Aýdan ortalyǵy Temirlanda jeke ınvestorlardyń esebinen bir qabatty 26, úsh qabatty 3 arendalyq turǵyn úıdiń qurylysy júrgizilip jatyr. Qazirde bir qabatty 40 páterdiń qurylys jumystary tolyǵymen aıaqtalǵan. Aldaǵy ýaqytta úı kezeginde turǵan az qamtylǵan otbasylyq sanattar boıynsha 136 páter tabystalady.
Sozaq aýdanynda da áleýmettik turǵydan osal toptaǵy azamattarǵa arnalyp salynǵan jańa baspanalardyń qurylysy aıaqtaldy. Sozaqtyq 48 otbasy jańa baspanalarynyń kiltin aldy. Oblys ákiminiń orynbasary Nurbol Turashbekov óńirde áleýmettik jaǵynan osal toptaǵy azamattardyń ómir sapasyn jaqsartý maqsatynda birqatar mańyzdy shara atqarylǵanyn atap ótti. «Bul jumystar oblys ákiminiń tikeleı baqylaýynda tur. El ıgiligine usynylǵan ár baspana aýdan turǵyndaryna jaıly ári zamanaýı qolaıly orta syılaıdy», dedi N.Turashbekov. Turǵyn úılerde turǵyndardyń jaıly ómir súrýine barlyq jaǵdaı jasalǵan. Ár páterdiń jalpy alańy 71,1 sharshy metrdi quraıdy.
Oblysta Memleket basshysy Qasym-Jomart Toqaevtyń bilim, medısına salalaryndaǵy ınfraqurylymdy jaqsartý, qoljetimdilikti arttyrý baǵytyndaǵy tapsyrmasyna sáıkes josparly jumystar jalǵasyp jatyr. Demografııalyq ósim joǵary óńirde qosymsha 35 myń oqýshy ornyna tapshylyq bar. Atalǵan máseleni sheshý maqsatynda 50 mekteptiń qurylysy, onyń ishinde jergilikti bıýdjet esebinen 21 mekteptiń qurylysy júrgizilip jatyr (7150 oryn). Jeke ınvestısııa esebinen 35 mektep salynady (6 230 oryn). Kópten jóndeý kórmegen 300-den astam bilim mekemesine jańǵyrtý jumystary júrgizildi. Sonymen qatar óńirde «Aýylda densaýlyq saqtaýdy jańǵyrtý» ulttyq jobasy aıasynda eldi mekenderde 41 medısınalyq nysan paıdalanýǵa berildi.
Túrkistan oblysy