Elimizde erekshe qajettilikteri bar azamattardyń quqy men qoǵammen aralasýyna barynsha jaǵdaı jasalǵan. Osyndaı ıgi qamqorlyqtyń arqasynda Qazaqstannyń Bochcha federasııasy múgedektigi bar jandarǵa jan-jaqty qyzmet kórsetip keledi.
Áý basta elimizdegi Bochcha federasııasy osydan tórt jylǵa jýyq ýaqyt buryn múgedektigi bar balalardy tárbıelep otyrǵan ata-analar men «Teń múmkindikter álemi» qoǵamdyq qory jattyqtyrýshylarynyń bastamasymen irgesin qalady. Federasııanyń Qazaqstan aýmaǵynda 10 fılıaly jumys isteıdi. Olardyń árqaısysy óz óńirinde qyrýar sharýany qolǵa alyp otyr desek, qatelespeımiz.
Jalpy, federasııa daryndy sportshylardyń kásibı biliktiligin arttyrý jáne olardy halyqaralyq bochka jarystaryna, sonyń ishinde Paralımpıada oıyndaryna odan ári shyǵarý maqsatynda qurylǵan. Ujym osy maqsatqa jetý jolynda úlken jetistikterge jetti. Nebári tórt jylǵa jeter-jetpes ýaqyt ishinde qaýymdastyq Qazaqstan Respýblıkasy Ulttyq Paralımpıadalyq komıtetiniń qurmetine ıe boldy, akkredıtasııa aldy, bochchany Qazaqstan Respýblıkasy sport túrleriniń tizilimine engizýge qol jetkizdi. Sonymen birge, ulttyq qurama jasaqtaldy, birinshi respýblıkalyq ashyq týrnırdi de uıymdastyryp úlgerdi. Qazaqstan chempıonatyn da ótkizdi.
Qazaqstandyq Bochcha federasııasy resmı túrde Halyqaralyq Bochcha federasııasyna – Boccia International Sports Federation (BISFed) múshesi boldy. Munyń úlken jetistikke balaý kerek, óıtkeni bul federasııaǵa múshe bolý erekshe qazaqstandyq sportshylar úshin jańa múmkindikter ashady.
Sondaı baıandy bastamalardyń biri retinde federasııanyń qaıyrymdylyqpen aınalysatyn isker azamattardy biriktiretin áleýmettik mańyzy bar jobany – Mesenattar klýbyn qurýdy qolǵa alǵanyn atap ótýge bolady. Bul klýb federasııaǵa ınklıýzıvti bochcha oıynyn damytýǵa kómektesýdi jáne múgedektigi bar sportshylarǵa qoldaý kórsetýdi maqsat tutady. Jalpy, Densaýlyq saqtaý mınıstrliginiń resmı málimeti boıynsha, Qazaqstanda 700 myńǵa jýyq múgedektigi bar adam bolsa, onyń 98,3 myńy balalar. Al olardyń áleýmettik ómirge qosylǵanyn jáne qabyldanǵanyn sezinýin qamtamasyz etý úshin búkil álemde ınklıýzıvtilik qaǵıdattary saqtalady. Osy úderisten biz de qalys qalmaýǵa tıispiz.
Osy oraıda, atalǵan klýb rezıdentteri federasııaǵa strategııalyq mindetterdi júzege asyrýǵa kómektesip, bochcha boıynsha Qazaqstan Respýblıkasynyń chempıonattaryn ótkizedi, sportshylardy joǵary sapaly kásibı sporttyq qural-jabdyqtarmen qamtamasyz etedi. Sondaı-aq, oqý-jattyǵý jıyndaryn uıymdastyrady, sporttyq-saýyqtyrý keshenderin turǵyzyp, halyqaralyq reıtıngtik jarystarǵa qatysýǵa yqpal etedi. Sonymen qatar halyqaralyq sarapshylardy tarta otyryp, jattyqtyrýshylardyń biliktiligin arttyrý jumystarynda júıeli qarjylyq qoldaý kórsetedi.
Sondaı mesenattardyń biri – VIII shaqyrylymdaǵy Almaty qalasy máslıhatynyń depýtaty Nurymbek Taý. Ol 2004 jyly Q.I.Sátbaev atyndaǵy Qazaq ulttyq tehnıkalyq ýnıversıtetin «Taý-ken ınjeneri-munaıshy» mamandyǵy boıynsha bitirgen. Eńbek jolyn 2004 jyly osy oqý ornynyń «Munaı isi» kafedrasynyń oqytýshysy bolyp bastady. 2008 jyldan qazirgi ýaqytqa deıin «Daco motors KZ» kompanııasynyń negizin qalaýshy.
Nurlybek Taý – tabysty kásipker, bes bala tárbıelep otyrǵan úlgili áke. Ol sondaı-aq qaıyrymdylyq sharalaryna belsendi túrde atsalysady, naǵyz atymtaı jomart azamat. Nurlybek áleýmettik jobalardy qoldaý árbir tabysty adamnyń ómirinde erekshe oryn alýy kerek dep sanaıdy.