Aqpan aıynyń 14-inen bastap Reseı Jaıyq ózeniniń bastaýyndaǵy Irekli sýqoımasynan jiberiletin sý kólemin sekýndyna 60 tekshe metrden 108 tekshe metrge kóbeıtti.
Bul – soltústik kórshimizdiń byltyrǵy alapat sý tasqynynan sabaq alyp, erterek qam jasaǵan qareketi. Qazirdiń ózinde Irekli sýqoımasy 76%-ǵa tolyp tur. Byltyr kóktemde kúrt erigen qar sýy qoımadan shyǵyp úlgermeı, jolyndaǵynyń bárin jaıpap, Jaıyq ózeniniń joǵarǵy jaǵyndaǵy halyqty da biraz ábigerge saldy.
Oblys basshylyǵy Reseı Federasııasynyń Orynbor, Saratov oblystaryndaǵy gıdrotehnıkalyq keshenderdiń jaı-kúıi, tómenge túsip jatqan sý mólsheri týraly kúndelikti aqparat almasyp otyr. Oblys ákimi bastaǵan arnaıy delegasııa Orynbor oblysynyń múddeli vedomstvolarymen kezdesip qaıtty.
Kóp jylǵy esepteýge qaraǵanda, Irekliden qulaǵan sý Batys Qazaqstan oblysyna jetkenshe bir aıdaı ýaqyt ótedi. Mamandar ázirge tasqyn qaýpi joq ekenin aıtyp otyr. Qazir Oral qalasynyń tusynda sýdyń deńgeıi 1,6 metr ǵana. Sý 6 metrlik deńgeıden asqanda ǵana arnasynan shyǵyp, saıajaılardy basa bastaıdy.
Jaqynda oblys ákimdiginde kóktemgi sý tasqynynyń aldyn alý boıynsha májilis ótti. Gıdrologter, meteorologter, tótenshe jaǵdaı qyzmeti aldaǵy yqtımal tasqynnyń boljamyn jasap, daıyndyqty kúsheıtken.
«Naýryz aıynda kún kúrt jylynyp, nóser bolsa, toń erip úlgermeı, sý jerge sińe almaı, erigen qar sýynan tasqyn paıda bolýy múmkin. Ásirese Oral qalasynda, Tasqala, Qaztalov, Terekti, Bórli, Shyńǵyrlaý, Syrym, Qaratóbe, Aqjaıyq, Báıterek aýdandarynda tasqyn qaýpi joǵary», deıdi oblys ákiminiń orynbasary Baqytjan Haberuly.
Búginde oblysta sý basý qaýpi bar 186 eldi meken esepke alynǵan. 2025 jylǵy sý tasqyny kezeńinde eldi mekenderdi qarǵyn sýdan qorǵaýǵa 3,9 mlrd teńgege jalpy uzyndyǵy 107 shaqyrym 53 qorǵanys bógeti turǵyzylǵan. Onyń ishinde Shyńǵyrlaý ózeninde uzyndyǵy 25,2 km 8 bóget, Qaldyǵaıty ózeninde 3 km 2 bóget, О́leńti ózeninde 6,5 km, Buldyrty ózeninde 1,2 km, Elek ózeninde 13,2 km 5 bóget, Qaıyńdy ózeninde 1 km, Jaqsybaı ózeninde 3,2 km, Saryózende 0,5 km, Bykov ózeninde 3 km bóget salyndy. Jaıyq ózeni jaǵalaýlaryna jalpy uzyndyǵy 23,8 km 14 bóget tústi. Dalada erigen qar sýyn qaýipsiz jaqtarǵa baǵyttaýǵa arnalǵan 26,4 km 18 bóget soǵylǵan. Sonymen birge 9 km sý burý kanaly, 93 km aryq salyndy, eldi mekenderdiń ishinde 582 metr sý ótkizý qubyrlary ornatyldy. 74 km magıstraldyq kanaldar tazartyldy. Kóshim, Bykov ózenderiniń túbin tereńdetý, tazalaý jumysy júrgizildi.
Batys Qazaqstan oblysy