Bolgarııanyń Panagıýrıshte qalasynda ústel tenıısinen WTT Youth Contender halyqaralyq týrnıri ótti, dep jazady Egemen.kz.
Qazaqstan quramasynyń ókili Jánııa Bekmuhambetova baıraqty básekede bolgar sportshylary Radına Zaharıevany, Martına Nıkolovany, Beloslava Balkanskaıany, slovakııalyq Vıven Mýrkovty, rýmynııalyq Karıss Serbandy jáne Bıanka Tomýdy utty. Sóıtip ol 13 jasqa deıingiler arasynda myqty qarsylastarynyń eshqaısysyna múmkindik qaldyrmaı, altynnan alqa taqty.
Aıta ketelik, Jánııa Bekmuhambetova 2024 jyly tamyz aıynda Horvatııada ótken WTT Youth Contender týrnırinde 11 jasqa deıingi sportshylar arasynda úzdik atandy jáne Slovenııa, Mysyr, Slovakııa, Vengrııa, Italııa elderinde de úzdikter qatarynan kórindi. Keıbir týrnırlerde ózinen úlken qarsylastary arasynda jeńis tuǵyrynan eki ret kóringen kezderi de boldy.