Oral qalasynda «Aıkerbez» shyǵarmashylyq ujymy ulttyq naqyshtaǵy sán keshin ótkizdi. Dástúrli maýsymdyq sán kórsetiliminde erler men áıelderge arnalǵan ulttyq naqyshtaǵy kúndelikti kıim úlgileri usynyldy.
Dástúr men zamanaýı stıldi úılestirgen erekshe keshte jergilikti dızaınerlerdiń qolynan shyqqan kıimder men qolóner buıymdary kópshilikke tanystyryldy. Kelýshiler Aınagúl Halyqqyzynyń erler men áıelderge arnalǵan shapan, jeıde, kóılek, oramaldaryn, Svetlana Dúısenbaevanyń quraq sómkelerin, beldikterin, Gúljan Esmadııarovanyń ádemi taqııalaryn tamashalap, jeńildikpen satyp alyp jatty. Sondaı-aq Gúljanar Arystanova men Janargúl Jáńgirovanyń erekshe keýdesheleri men taqııalary, Lázzat Shaǵataıdyń áıelderge arnalǵan jeńil shapandary, Lııa Tólegenovanyń áıelderge arnalǵan zamanaýı etnokıimderi kópshiliktiń nazaryn aýdardy. Móldir Eleýsinova usynǵan áıelderge arnalǵan kóılek, beldemshe, jeıdeler de kózdiń jaýyn aldy. Sán kórsetilimin uıymdastyrǵan «Nomadica» jobalar agenttigi bul keshke erekshe daıyndalǵan eken. Jańa kıimderdi kópshilikke kórsetken qyz-jigitter – jergilikti dızaıner Lýnara Ilhamqyzynyń «Li_fashion_models» mektebiniń modelderi de sahnalyq sheberligimen kózge tústi.
Erekshe atap óter jaıt – keshte usynylǵan kıimder tabıǵı maqta, zyǵyr, kıiz, jibek, vıskoza, velıýr matalarynan tigilgen eken. «Kıim úlgilerindegi oıý-órnekter kıimge salynatyn oıýlardyń erejesin saqtaı otyryp basylǵan» deıdi úlgi ıeleri. Kıim pishini – qasual style-daǵy maýsymnyń kez kelgen ýaqytynda kúndelikti kıip júrýge bolatyn, mindetti túrde qazaqy tabıǵat saqtalǵan, zamanýı úlgimen úılesimdi tabıǵı tústerden daıyndalǵan.
Bir qyzyǵy, keshte kıim sheberleriniń birlesken týyndylary sán álemindegi shyǵarmashylyq yntymaqtastyqtyń úlgisin kórsetti. Mysaly, Gúljanar men Janargúl usynǵan ulttyq stıldegi keýdesheler, Móldir tikken kóılektegi Svetlananyń qolynan shyqqan quraq qalta, Aınagúldiń shapanyna jarasa qalǵan Gúljannyń kıiz taqııasy – bári-bári dostyq pen jarasymdylyqtyń rámizi ispetti boldy.
– Sán – tek syrt kelbet emes. Ol – tarıh, ol – mádenıet, ol – bolashaqqa jazylǵan úndeý. Búgingi keshte sángerlerimiz babalar murasyn jańa boıaýmen sóıletti. Biz olarǵa alǵys aıtamyz! Ulttyq stıldi nasıhattaıtyn sán álemi damı bersin, – deıdi «Nomadica» jobalar agenttiginiń jetekshici Alfııa Shamaeva.
Batys Qazaqstan oblysy