Memleket basshysy Qasym-Jomart Toqaev bıylǵy Joldaýda sıfrlandyrýǵa basa mán berdi. Onyń ishinde ekonomıkany zaman órisinen qalys qaldyrmaı, tehnologııa tetikterine ilestirý mańyzdy bolyp otyr.
Qazaqstan Damý bankiniń (QDB) basqarma tóraǵasy Marat Elibaevtyń aıtýynsha, jahandyq sıfrlyq transformasııa jaǵdaıynda barynsha básekege qabiletti etýge baǵyttalǵan jobalardy qoldaý mańyzdy.
«Búginde biz tek ınfraqurylym men ónerkásipke ǵana emes, ekonomıkanyń tıimdiligin eseleıtin zamanaýı sıfrlyq sheshimderge de ınvestısııa salyp jatyrmyz. Bul óz kezeginde bızneske, eksportqa jáne joǵary tehnologııalyq jańa jumys oryndaryn ashýǵa múmkindik jasaıdy», deıdi M.Elibaev.
Máselen, jyl basynda QDB «Ulttyq aqparattyq tehnologııalar» AQ-men kelisim jasady. Sonyń negizinde Astanadaǵy derekterdi óńdeý ortalyǵyna Memlekettik kirister komıtetine qajet serverlik jabdyq berildi. Sondaı-aq Ekibastuz qalasynda jańa derekter ortalyǵyn salý úshin kredıttik jeli ashyldy. Bul derekter ortalyǵy el azamattarynyń jeke derekterin qorǵaıdy jáne aqparatqa úzilissiz qoljetkizýge jol ashady. Júıeniń toqtap qalý qaýpin de azaıtady. Sonymen qatar 55 turaqty jumys orny iske qosylady. IT, avtokólik óndirisi jáne kúrdeli hımııa sııaqty salalardy da qarjylandyryp otyr. Bul jańa biliktilik pen daǵdyny qajet etetin zamanaýı jumys oryndarynyń ashylýyna yqpal etedi.
«Biz elimizdiń bolashaq ekonomıkasyna qajetti ınfraqurylymdy qurýǵa basa nazar aýdaramyz. Onyń negizinde sıfrlyq sheshimder jatyr. Sıfrlyq orta ekonomıkanyń barsha qatysýshysy úshin ashyq, qolaıly ári qaýipsiz bolýy qajet ekenin jaqsy túsinemiz. Sondyqtan QDB sıfrlyq ózgeristerdiń basty qozǵaýshy kúshine aınalýǵa daıyn. Bul – iri IT-jobalardy qoldaýdan bastap, banktiń óz jumysynda ınnovasııalardy engizýge deıingi keń aýqymdy qamtıdy», dedi M.Elibaev.
Sonymen qatar bank nesıe úderisine qatysatyn barlyq tarapqa arnalǵan biryńǵaı sıfrlyq platforma – «KDB Product Space» júıesin iske qosty. Munda ár kezeń naqty ýaqyt rejiminde kórinip, tolyq baqylaýda bolady. Platforma mıkroservıstik arhıtektýra negizinde qurylǵan. Onyń quramyndaǵy «KDB Document Service» qujattarmen jumys isteýge arnalǵan. Bul júıede «OpenAI» ázirlegen OSS úlgisi negizinde qurylǵan jasandy ıntellekt agentteri bank ishinde tıimdi qyzmet kórsetedi. Qazir jasandy ıntellekt qaryz alýshylardyń qujattaryn taný men taldaý júıesinde qoldanylyp jatyr. Degenmen túpkilikti sheshimdi ár saladaǵy sarapshylar qabyldaıdy. Al jasandy ıntellekt olarǵa kómekshi retinde ýaqytty únemdeýge jáne taldaýdyń sapasyn kóterýge múmkindik beredi.
«Biz bank IT-arhıtektýrasyn tek búgingi qajettilikterge emes, keleshektiń mindetterine de tolyq jaýap beretindeı etip qalyptastyryp jatyrmyz. Úlken derekter men jasandy ıntellekt negizindegi sheshimderdi engizý jobalardy áldeqaıda dál baǵalaýǵa ári táýekelderdi azaıtýǵa jol ashady. Bul óz kezeginde sheshim qabyldaý úderisin jedeldetip, perspektıvaly bastamalardy keńinen qoldaýǵa múmkindik beredi», deıdi QDB aqparattyq tehnologııalar departamentiniń dırektory Sergeı Shmagın.
Bank qarjy aınalymynyń ashyqtyǵyn arttyrý úshin bıyl Ulttyq bank júrgizip otyrǵan sıfrlyq teńgeni engizý jónindegi qanatqaqty jobaǵa qatysýdy josparlap otyr. Bul bastama qarjy qozǵalysyn tolyq baqylaýǵa múmkindik berip, qarajattyń orynsyz jumsalýynyń jolyn kesedi.