Astananyń kúzi keıde Esenǵalı Raýshanovtyń jyrlaryna uqsap ketedi. Seleýdeı sarǵaıyp kórisedi de, qaýlaǵan ottaı kúreńitip, jalqyny talaýrap, sónbeı jatyp alady. «Jańa jyl kúzden bastalý kerek menińshe» degen aqyn nege bulaı jyrlaǵany sonda baıqalatyndaı. Shaıyrdy eske alýǵa arnalǵan «Ushty meniń qustarym bulttan ári» atty poetıkalyq kesh K.Baıseıitova atyndaǵy Qazaq ulttyq óner ýnıversıtetinde ótip, qazaq ádebıetiniń klassıgi týraly birsypyra estelik aıtylyp, óleńderi oqylyp, ánderi shyrqaldy.
Kesh teatr ánshileri hormen salǵan «Qara baýyr qasqaldaq» ánimen ashyldy. Tizginshi – aqyn, Jazýshylar odaǵy Astana fılıalynyń jetekshisi Baýyrjan Babajanuly Esaǵań týraly estelikterdi qabattap otyrdy. Ult ádebıetine uly týyndylar usynǵan Ábish Kekilbaıdyń Esenǵalı aqyn týraly lebizi ekrannan estildi. О́leń ólkesine qadam basqaly elden bólek Esenǵalı bop kelgen, ejelgi ári jańa turpatty jyrlar týraly kemeńger Ábish ájelerimizdiń kebejesindegi súrdiń sarqyndysyndaı dep beınelepti. Avtordyń «jasqa jas, oıǵa kári» soqqan tanymy tereń jyrlary tóńireginde Memlekettik syılyqtyń laýreaty, aqyn Ulyqbek Esdáýlet te keńirek toqtalyp, esteligin qosaqtady. Esaǵań áskerde júrgeninde-aq Amanhan Álim bastaǵan aqyndar onyń óleńderin dápterge kóshirip alyp, óz aralarynda qumary qanǵansha oqyp taratyp, ańyzy erte jetken. Al «Esenǵalıdyń Almatyǵa kelýi» týraly jyrdyń kúıindeı áńgime de, óleń de jeterlik. Sheteldik saparlary tipten shıyrlanyp jatyr.
Sóz sóılegen adamda tolas joq, árıne. Al aqyn jyrlaryn jerine jetkize oqyǵan shákirt shaıyrlary odan da kóp. Atap aıtqanda, aqyndar Erlan Júnis, Baýyrjan Qaraǵyzuly, Erǵalı Baqash, jazýshy Beıbit Sarybaı, taǵy bir top talantty jas Esenǵalı óleńderin oqysa, sońynan ergen aqyn baýyry Qalqaman Sarın sóz sóılep, janashyrlyǵyn eske aldy. Mádenıet jáne aqparat mınıstrligi Arhıv, qujattama jáne kitap isi komıteti Kitap isi basqarmasynyń basshysy, jazýshy Almaz Myrzahmet avtordyń kitaptary bıyl alty myń tırajben elimizdiń barlyq kitaphanaǵa jetetinin málimdedi.
Naǵyz aqyn sózderi bara-bara ánge aınalyp ketedi degen pikir ras, tegi. Esaǵańnyń kóptegen óleńine án jazylǵan jáne shyrqalyp júrgeni belgili. Máselen, «Joldanbaǵan hat» atty jyryn ánshiler eki túrli nusqada oryndaıdy. Biri salmaqty, biri jeńildeý yrǵaqta. Eske alý keshinde aqyn sózine jazylǵan «Jalǵyz jıde», «Aq kóılegiń etegi búrmeli edi» ánderin Aıgúl Qumash, Tabyldy Dosymov ánin jazǵan «Joldanbaǵan hat» týyndysyn Abyl Aıash jáne taǵy da basqa shyǵarmalary oryndaldy. Jazýshylar odaǵy uıymdastyrǵan eske alý keshi sońynda aqynnyń aıaýly jary Naýat apamyz sóz sóılep, Esenǵalıdyń týǵan kúni – 5 qazandy el kólemindegi aqyndar toıyna ulastyrsa degen pikirin juptady.