Almatydaǵy Jedel medısınalyq kómek kórsetý aýrýhanasynda sıfrlyq kelisimder júıesin engizý jobasy bastaldy. Bıyl tamyz aıynda aýrýhana men «TrustMe IT» kompanııasy jańa sıfrlyq sheshim engizý jóninde memorandýmǵa qol qoıyp, qanatqaqty joba resmı túrde iske qosyldy.
Buǵan deıin medısınalyq kómekke kelisim berý nemese bas tartý rásimderi tek qaǵaz túrinde júrgizilip kelgen. Qujattardy muraǵatqa jınaqtap, kún saıyn júzdegen betti skanerleý jáne bazaǵa qolmen engizý qyzmetkerlerdiń ýaqytyn alyp, qaǵaz shyǵynyn arttyratyn. Jańa júıe bul máselelerdi sheshýge baǵyttalǵan. Endi kelisimder SMS arqyly rásimdeledi. Barlyq kelisimder men bas tartýlar avtomatty túrde júıede jasalyp, elektrondy formatta saqtalady. Qazirde tek bas tartýlar ǵana qolmen engizilse, bolashaqta kelisimder de tolyq avtomattandyrylyp, biryńǵaı derekter qory qalyptasady. «TrustMe IT» kompanııasynyń negizin qalaýshy Shyńǵys Dáýletbaev jańa jobanyń medısınadaǵy sıfrlyq úderisterdi ilgeriletýde erekshe mańyzy bar ekenin atap ótti. Onyń aıtýynsha, zamanaýı júıe qaǵazbastylyqty azaıtyp qana qoımaı, aqparattyń sapaly ári jedel óńdelýin qamtamasyz etedi.
Qanatqaqty joba sátti júzege asqan jaǵdaıda, júıe aýrýhana qyzmetimen tolyq ıntegrasııalanyp, kelisimderdi birden ishki júıe arqyly rásimdeýge múmkindik beredi.
Sondaı-aq jasandy ıntellekt tehnologııalaryn engizý josparlanyp otyr. Bul medısınalyq kartalardy toltyrýdy jedeldetip, derekterdegi qatelik táýekelin azaıtady. Júıeni kadr bólimi, býhgalterııa, ákimshilik sekildi ózge qurylymdarda da qoldaný múmkindigi qarastyrylǵan.
Joba medısınalyq qyzmetkerlerdiń jumysyn jeńildetip qana qoımaı, pasıentterdiń ómir sapasyn jaqsartýǵa yqpal etedi. Aldaǵy ýaqytta mundaı tájirıbe elimizdiń ózge óńirlerinde de engizilip, densaýlyq saqtaý salasyn sıfrlandyrý qarqynyn jedeldetedi.
Ashat QOIShYǴARA