Sońǵy kezderi Memleket basshysynyń qamqorlyǵy men qoldaýy kitaphana salasyna órkendi ózgeris ákeldi. Kitaphanashylardyń jalaqysy edáýir artty. 23 sáýir Ulttyq kitap kúni bolyp belgilendi. Túngi kitaphanalar jumys isteı bastady. О́zge de atqarylyp jatqan ıgi sharalar kóńilge qýanysh uıalatady.
Ońtústik óńiriniń shalǵaıdaǵy Sozaq óńirinde kezinde aýdan basshylarynyń tabandylyǵy men erik-jigeriniń arqasynda kitaphanalar jekeshelendirý naýqanynan aman qalǵan. Sonyń ıgiligin búginde jurtshylyq kórip otyr. Kitaphanaǵa barǵanymyzda onda top-top bolyp júrgen oqýshy jastardy kórgende súısinip-aq qalamyz. Áńgimelese kele bilgenimiz – ustazdary ádebı kitaptar oqyp, ártúrli taqyryptarda esseler jazýǵa mashyqtandyratyn kórinedi. Kitaphanadaǵy kitap qory óte baı. Sórelerde álem, shetel ádebıetinen bastap, qazaq qalamgerleriniń de týyndylary samsap tur.
Kitaphanadan kezinde kezdesýge kelgen aqyn-jazýshylardyń qoltańbalary men pikirlerin oqı alasyz. Ábish Kekilbaı, Sherhan Murtaza, Satybaldy Narymbetov, Saýytbek Abdrahmanov, t.b. qalamgerler kitaphana týraly pikirleri shalǵaı aýdan jurtshylyǵynyń mádenı deńgeıiniń qanshalyqty ekenin ańǵartatyndaı.
Tereń oılap qaraǵan adamǵa, kitap – aınymas dos, jalyqtyrmaıtyn serik, aqy suramaıtyn keńesshi. Jigerińdi qaırap, tilińdi baıytady, jan dúnıeńdi tebirentip, sheshendikke baýlıdy, óreńdi keńitip, sanańdy damytady. Kitap arqyly adam basqalardy qurmetteýdi úırenedi.
Hakim Abaı: «Artyq ǵylym kitapta, erinbe oqyp, kórýge» dese, Ahmet Baıtursynuly: «Oqýsyz halyq qansha baı bolsa da biraz jyldardan keıin onyń baılyǵy ónerli halyqtardyń qolyna kóshedi», dep kóshten qalmaýǵa shaqyrǵan.
«Bar kitap bir kitapty túsiný úshin oqylady» degendeı, kitaptardyń bári de ardaqty. Ol eń aldymen tildi mashyqtandyrady, bilim damyp, túsinik keńeıedi. Aıta bersek, kitaptyń paıdasy sheksiz.
Káribaı ÁMZEULY
Túrkistan oblysy