Memleket basshysy Qasym-Jomart Toqaev «Taza Qazaqstan» ekologııalyq aksııasyna qatysty.
Prezıdent Astana qalasyndaǵy Botanıkalyq saıabaqta erikti jáne belsendi jastarmen birge aǵash ekti. Jalpyulttyq is-shara aıasynda bıyl respýblıka aýmaǵynda 2,4 mıllıonǵa jýyq kóshet otyrǵyzylǵan.
Memleket basshysy «Jasyl el» uıymynyń belsendilerimen áńgimelesip, qoǵamdyq jumysqa atsalysyp júrgen jastarǵa alǵys aıtty.
– Barshańyzǵa rızashylyǵymdy bildiremin. Bul – óte qajetti jumys. Elimiz ben halqymyz úshin kerek is. Sondyqtan sizderge tabys tileımin. Isterińiz sátti bolsyn. Eń aldymen nıetimiz taza bolýy kerek. Otanymyz úshin qyzmet etýge tıispiz. «Jasyl el» uıymynyń jumysyn qoldaımyn. Jumystaryńyz ózge jastarǵa ónege, olar cizderden úlgi alady, – dedi Qasym-Jomart Toqaev.
Sodan keıin Prezıdent «Nura» aýdanyndaǵy «Greenline» býlvaryn aralap kórdi. Aýmaǵy 3,8 gektar bolatyn nysandaǵy jumystyń birinshi kezeńi aıaqtalǵan. Munda jaıaý júrginshilerge jáne velosıpedshilerge arnalǵan joldar, sáýlettik qalyptar jáne jasandy toǵandar bar.
Memleket basshysyna Astana qalasyndaǵy abattandyrý jumystary jaıynda málimet berildi.
Jeńis Qasymbek elordada qazir 170 qoǵamdyq keńistik pen aýlany abattandyrý boıynsha keshendi baǵdarlama iske asyrylyp jatqanyn aıtty. Bul jumystar Botanıkalyq baqta, Trıatlon parkinde, Atatúrik, Beıbitshilik jáne kelisim, Prezıdent saıabaqtary men qalanyń negizgi kóshelerinde júrgizilip jatyr. Sonymen qatar «Myńjyldyq» alleıasyn abattandyrýdyń tujyrymdamasy jasaldy. Esil ózeniniń jaǵalaýyn rekonstrýksııalaý sharalary aıaqtalýǵa jaqyn.
Memleket basshysy qala ınfraqurylymyn jetildirý, turǵyndarǵa zamanaýı ári qolaıly, ekologııalyq turǵydan taza orta qalyptastyrý baǵytyndaǵy jumystardy jalǵastyrý jóninde tapsyrma berdi.