Senat depýtattary jáne apparat qyzmetkerleri Memleket basshysynyń bastamasymen iske asyrylyp kele jatqan «Taza Qazaqstan» jalpyulttyq ekologııalyq aksııasy aıasynda qalalyq senbilikke qatysty. Is-sharaǵa dinı birlestikter ókilderi, Konfessııaaralyq jáne dinaralyq dıalogtiń halyqaralyq ortalyǵynyń qyzmetkerleri, Senat janyndaǵy Sarapshylar klýby men Taldaý mektebiniń túlekterin biriktiretin «Taldau Community»-diń músheleri de úles qosty.
Senatorlar qatysqan «Taza Qazaqstan» ekologııalyq aksııasy bul joly Beıbitshilik jáne kelisim saıabaǵynda ótti. Ol Álemdik jáne dástúrli dinder kóshbasshylarynyń sezi aıasynda ashylǵan jańa biregeı oryn ekenin atap ótken jón. Dál osy jerde úsh jyl buryn, ıaǵnı 2022 jyly Rım Papasy Fransısk, Ál-Azhardyń Joǵarǵy ımamy Sheıh Ahmed at-Taıeb jáne basqa da álemdik dinderdiń lıderleri saıabaqtyń negizin qalap, aǵash otyrǵyzǵan edi. Bıyl Álemdik jáne dástúrli dinder kóshbasshylarynyń VIII sezi kezinde atalǵan oryn resmı túrde ashylyp, dinder men mádenıetter arasyndaǵy rýhanı kópirdiń jarqyn rámizine aınaldy.
Is-shara barysynda «Taza Qazaqstan» aksııasy tek ekologııalyq emes, sondaı-aq rýhanı tazalyqqa jáne izgi nıetke shaqyratyn bastama ekeni aıtyldy. Osy oraıda senbiliktiń Beıbitshilik jáne kelisim saıabaǵynda ótkizilýiniń sımvolıkalyq mánine de nazar aýdaryldy.
Senat tóraǵasy «Taza Qazaqstan» jalpyulttyq aksııasy azamattardyń densaýlyǵy, bolashaq urpaqtyń ıgiligi jáne eldiń ornyqty damýy jolynda aıryqsha mańyzǵa ıe ekenine toqtaldy. Sondaı-aq ol Memleket basshysy qoǵamda ekologııalyq mádenıet qalyptastyrýǵa jáne tabıǵatqa jaýapkershilikpen qaraý qaǵıdattaryn dáripteýge únemi basa mán berip kele jatqanyn atap ótti. Máýlen Áshimbaev bul qaǵıdattar qazaqstandyqtardyń jasampaz qundylyqtarynyń kórinisi ekenin de tilge tıek etti.
«Prezıdentimiz óziniń Joldaýynda qorshaǵan ortaǵa janashyr bolý, oǵan úlken jaýapkershilikpen qaraý ulttyq ıdeologııanyń ózegine aınalýy kerek ekenin aıtty. Memleket basshysy osyǵan baılanysty tazalyq mádenıetin qoǵamda tereń ornyqtyrý úshin ekologııalyq aǵartý isiniń biryńǵaı úlgisin engizýdi tapsyrdy. Jalpy, keıingi jyldary Prezıdenttiń bastamasymen elimizde tazalyqty dáripteýge, qorshaǵan ortany qorǵaýǵa, ekologııaǵa janashyrlyqpen qaraýǵa úlken kóńil bólinip jatyr. «Taza Qazaqstan» – dástúrli jalpyulttyq aksııasy osy baǵyttaǵy aýqymdy jumystyń jarqyn kórinisi», dep M.Áshimbaev aksııaǵa qatysqan azamattarǵa alǵys bildirdi.
Jalpy, atalǵan senbilikke 200-ge jýyq adam qatysqanyn aıta ketken jón. Olar 100-den asa aǵash otyrǵyzdy. Senatorlar «Taza Qazaqstan» ekologııalyq aksııasyn qolǵa alynǵan jyldan beri belsendi qoldap kele jatqandaryn tilge tıek etip, bul qorshaǵan ortaǵa qamqorlyqpen qaraýdy ádetke aınaldyratyn jáne qalany kógaldandyrýdy dáripteıtin, turǵyndar úshin jaıly orta qalyptastyratyn mańyzdy bastama ekenine nazar aýdardy.