Ázerbaıjannyń Bakın memlekettik ýnıversıtetiniń (BMÝ) rektory Elchın Babaev bilim men ǵylym salasyndaǵy jahandyq ózgerister aıasynda Qazaqstan men Ázerbaıjan joǵary oqý oryndarynyń yntymaqtastyǵy kúsheıip kele jatqanyn atap ótti.
Onyń aıtýynsha, sıfrlyq transformasııa, jasandy ıntellekttiń damýy, «jasyl» tehnologııalar men basqarýdaǵy etıkalyq qaǵıdattar jańa jahandyq bilim berý kún tártibin qalyptastyrýda.
«Qazaqstan men Ázerbaıjan — Eýrazııa keńistigindegi strategııalyq memleketter. Olar ǵylymı dıplomatııa men akademııalyq ózara is-qımyldy damytý arqyly aımaqtyq transformasııanyń kóshbasshysy bolýǵa áleýetti», — dedi Elchın Babaev.
Ol BMÝ-diń Qazaqstannyń jetekshi joǵary oqý oryndarymen, sonyń ishinde ál-Farabı atyndaǵy Qazaq ulttyq ýnıversıtetimen, Sátbaev atyndaǵy Qazaq ulttyq tehnıkalyq zertteý ýnıversıtetimen, Esenov atyndaǵy Kaspıı ýnıversıtetimen, L.N. Gýmılev atyndaǵy Eýrazııa ulttyq ýnıversıtetimen jáne H. Dosmuhamedov atyndaǵy Atyraý ýnıversıtetimen belsendi áriptestik ornatqanyn aıtty.
Rektordyń sózinshe, BMÝ janynan ashylǵan Abaı ortalyǵy gýmanıtarlyq baılanystardy nyǵaıtýǵa jáne qazaq mádenıetin nasıhattaýǵa zor úles qosyp keledi.
Elchın Babaev Qazaqstandyq seriktestermen birlesip birqatar jańa bastamalardy júzege asyrýǵa daıyn ekenin jetkizdi. Olardyń qatarynda birlesken akademııalyq keńes, ǵylymı-zertteý jáne ınnovasııalyq qor, sondaı-aq jas ǵalymdar jelisin qurý josparlanǵan. Bul jobalar jastardyń ǵylymı-zertteý qyzmetin, ınnovasııalyq ázirlemelerin jáne akademııalyq utqyrlyǵyn qoldaýǵa baǵyttalǵan.
Sondaı-aq ol 2025 jyldyń naýryz aıynda Bakýde ótken Study in Kazakhstan kórmesiniń jáne osy aptada uıymdastyrylǵan jasandy ıntellekt etıkasy jónindegi birlesken konferensııanyń tabysty ótkenin atap ótti. Rektordyń aıtýynsha, Ázerbaıjan jastarynyń Qazaqstanda bilim alýǵa jáne ǵylymı jobalardy iske asyrýǵa degen qyzyǵýshylyǵy artyp keledi.