Qazaqstan – О́zbekstan: О́rkendeý jolyndaǵy strategııalyq seriktes, senimdi odaqtas

Dostyq – baǵa jetpes baılyq

Ushaq trapynan túsken boıda qarsy alyp, keıin Qasym-Jomart Toqaevqa О́zbek­stannyń eń joǵary memlekettik nagradasy – «Olıı Darajalı Dўstlık» («Joǵary dárejeli dostyq») ordenin tabys­­taýy Shavkat Mırzııoevtiń, ózbek eli­niń aı­ryqsha qurmetin ańǵartty. Bul mara­­patty jeke ózine ǵana emes, tutas Qazaq­­stan hal­qyna kórsetilgen sheksiz qurmet­tiń belgisi retinde qabyl alǵanyn Qasym-Jomart Toqaev nagradany tabystaý saltana­tyn­da aıtty. Sonymen qatar ózbek kósh­bas­shysy­nyń eki el arasyndaǵy dostyq pen tatý kór­shilik baılanysty nyǵaıtýǵa qosqan úlesin aıryqsha baǵalaıtynyn jetkizdi.

– Bul joǵary nagrada dostyq, beı­bitshi­lik jáne qurmet sekildi qazaqstan­dyq­tardyń janyna jaqyn qundy­lyqtardy ári sonymen úndes ózbek halqynyń rýhyn aıshyqtaıdy. Ordenniń ataýy elderimiz arasyndaǵy qarym-qatynastyń mazmu­nyn dálme-dál sıpattaıdy. Qazaqstan men О́zbek­­stannyń dostyǵy – baǵa jetpes baı­ly­ǵymyz. Biz ony kózimizdiń qarashyǵyn­­­­daı saqtap, baýyrlas halyqtardyń ıgiligi úshin ór­kendetemiz. Birlesken qajyr-qaı­rat­tyń arqasynda qazaq-ózbek strategııa­­lyq seriktestigi men odaqtastyǵyn udaıy jańa mazmunmen baıyta beremiz dep senemin. Uly Abaı men Naýaı dostyqtyń ozyq úlgisin dáriptep, ózara senim halyqtardyń tatýlyǵyn nyǵaıtatynyn, bir-birine qurmet ony shyńdaı túsetinin nasıhat etti. Osy ósıetke súıenip, О́zbekstanmen baýyrlastyq odaqty nyǵaıtýǵa basa mán beremiz, – dedi Memleket basshysy.

Al О́zbekstan Prezıdenti Qazaqstan­nyń áleýmettik-ekonomıkalyq damýdaǵy jetis­tikteri men eldiń halyqaralyq arena­daǵy tabystary Qasym-Jomart Toqaevtyń esimi­men tikeleı baılanysty ekenine toqtaldy.

– Osyndaı saltanatty rásimde Sizge, elimizdiń shyn janashyryna О́zbekstan­nyń joǵary memlekettik nagradasy  joǵary dárejeli «Dýstlık» ordenin tabystaý – men úshin úlken mártebe. Bul – kópult­ty О́zbekstan halqynyń Qazaqstan Respýb­lı­kasy Prezıdentiniń eren eńbegine kórset­ken qurmeti men shynaıy baǵasy. Bizdiń elimiz Sizdi búkil álem biletin kórnek­ti memleket jáne saıa­sı qaıratker retinde jaqsy tanıdy. Sizdiń parasatty basshy­lyǵyńyzben Ádiletti Qazaqstandy qurýǵa baǵyttalǵan aýqymdy reformalar júr­gizi­lip jatyr. Barlyq salada jarqyn jetis­tikter bar. Qazaqstandyqtardyń ál-aýqaty turaqty túrde artyp keledi. Eń bastysy, halqyńyzdyń erteńge degen senimi zor. Biz jaqyn dos ári kórshi retinde Qazaqstannyń tabysyna shyn júrekten qýanamyz, – dedi Shavkat Mırzııoev.

 

Igilik jolyndaǵy san qyrly baılanys

Kóksaraıdaǵy kezdesý barysynda memleket­ basshylary qazaq-ózbek stra­te­gııa­lyq seriktestigi men odaqtasty­ǵyn odan ári damytý keleshegin egjeı-teg­jeı talqylady. Saýda, ónerkásip koopera­sııasy, kólik-logıstıka, energetıka, aýyl sharýashylyǵy, sý resýrstary sekildi basym baǵyttardaǵy, sondaı-aq mádenı-gýmanıtarlyq salalardaǵy yqpaldastyqty nyǵaıtý máselelerin qarastyrdy. О́ńirlik jáne halyqaralyq kún tártibiniń ózekti máseleleri jóninde pikir almasty.

Qazaqstan men О́zbekstan prezıdent­teri qatysqan Joǵary memleketaralyq keńes­tiń ekinshi otyrysynda Memleket basshysy saparynyń basty maqsaty qos halyqtyń dostyǵyn nyǵaıtyp, tatý kórshilik baılanysyn kúsheıtý, sondaı-aq túrli saladaǵy ózara tıimdi yqpal­dastyqty damytý ekenin atap ótti.

Halyqaralyq ahýal aýmaly-tókpeli kezeńde san qyrly yqpaldastyqtyń damý qarqynyn arttyrý qajet ekenine toqtalǵan Memleket basshysy О́zbekstan Prezıdentimen kelissóz barysynda saıa­sı jáne ekonomıkalyq baılanystardy jandandyra túsetin jańa baǵyttar aıqyndalǵanyn jetkizdi. Eń áýeli, saýda-ekonomıka salasyna erekshe mán berý, ol úshin ósimniń tyń múmkindikterin izdeý, taýarlar nomenklatýrasyn keńeıtý jáne shıkizattyq emes eksportty yntalandyrý sharalaryn qabyldaý qajet.

– Osy oraıda ózara taýar aına­ly­myn arttyrý baǵdarlamasyn sapaly júze­ge asyrý mańyzdy. Búgin quryla­tyn О́ńir basshylary keńesin, sondaı-aq Iskerlik keńes pen «UzKazTrade» birlesken saýda kompanııasy sekildi basqa da ekijaqty mehanızmderdiń jumy­synan naqty nátıje kútemiz, – dedi Qasym-Jomart Toqaev.

Aýyl sharýashylyǵy salasyndaǵy yntymaqtastyqtyń da áleýeti zor. Bul oraıda Qasym-Jomart Toqaev qarapaıym saýdadan góri et, bıdaı, maıly daqyldardy óńdeýdiń tolyq óndiristik tizbesin qalyptastyrýdy, mal sharýashylyǵy men organıkalyq egin sharýashylyǵyn birge damytýdy usyndy. О́nerkásip kooperasııasyna úlken úmit artatynyn aıtty.

– Qazirgi kezde jalpy somasy 1,5 mlrd dollardan (1,7 mlrd dollar) asatyn 78 birlesken jobamyz bar. Onyń aıasynda 15 myńnan asa jumys ornyn ashý kózdelgen. Atalǵan jobalar tolyq iske assa, ekonomıkalyq jáne ınves­tısııalyq yqpaldastyǵymyz aıtar­lyqtaı kúsheıedi. Búgin olardyń bir parasyn iske qosamyz. Qazaqstannyń О́zbekstanǵa salatyn ınvestısııasyn odan ári yntalandyrýǵa nıettimiz. Bul rette ózbek dostarymyzdan ádettegideı qoldaý kútemiz. Qurylysy júrip jatqan «Ortalyq Azııa» halyqaralyq ónerkásip kooperasııasy ortalyǵy ındýstrııalyq qýatymyzdy odan ári arttyrýda mańyzdy ról atqarady, – dedi Memleket basshysy.

Sonymen qatar Prezıdent kólik-tranzıt salasyndaǵy yqpaldastyqty keńeı­týdiń strategııalyq sıpatyna toqtal­dy. Atap aıtqanda, tarıfterdi ońtaı­lan­dyrý, ákimshilik kedergilerdi azaıtý shara­lary qabyldanyp, shekara mańy ınfraqu­rylymyn damytý jáne ótkizý beketterin jańǵyrtý jumystary qolǵa alyndy.

Qasym-Jomart Toqaev eki el úkimet­teri logıstıkalyq tizbektiń bar­lyq qaty­sý­shysyna ońtaıly jaǵ­daı týǵyzyp, ınfra­qu­rylymdyq, norma­tıvtik jáne ıns­tıtýsıonaldyq mindetterdi sheshýi qajet dep sanaıdy. Budan bólek, Transkaspıı halyqaralyq kólik baǵ­daryn, Soltústik – Ońtústik dálizin, son­daı-aq Aýǵanstan arqyly temirjol baǵy­­tyn damytý aıasyn­daǵy tıimdi yqpal­das­tyq­ty jalǵastyrý ózekti. Qazaqstan Prezı­denti ózbek tarapyn Transkas­pıı halyq­aralyq kólik baǵytyn birge órken­detý úshin Aqtaý jáne Quryq port­tary boıynsha seriktestik quryp, logıs­tı­kalyq jobalardy júzege asyrýǵa shaqyrdy.

Sý-energetıka salasyndaǵy konstrýk­tıvti yntymaqtastyq asa mańyzdy. О́ıtkeni transshekaralyq ózenderdiń sý resýrsyn tıimdi paıdalaný – eki eldiń turaqty alǵa ilgerileýine yqpal etetin basty faktorlardyń biri. Bul oraıda Qasym-Jomart Toqaev Qazaqstan men О́zbekstan úkimetterine sý sharýashylyǵy saıasatyndaǵy tásilderdi úılestirý úshin júıeli sharalar ázirleýdi usyndy.

Memleket basshysy jasandy ıntellek­tini damytý máselesine aıryqsha nazar aýdardy.

– Qazaqstanda memlekettik basqarý­dyń tıimdiligin jáne azamattardyń turmys sapasyn jaqsartý maqsatyn­da memlek­et­tik qyzmetterdi sıfr­lan­dyrýǵa, IT tehnologııalardy damytýǵa basa mán beriledi. «Alem.ai» halyqaralyq jasandy ıntellekt ortalyǵy ashyldy, osy saladaǵy zertteý ýnıversıtetiniń negizi qalanýda, ulttyq sýperkompıýter iske qosyldy. Jalpy, Qazaqstandy sıfr­lyq elge aınaldyrý mindeti qoıyl­dy. О́zbekstan da sıfrlandyrýǵa jáne ja­sandy ıntellekt tehnologııasyn damy­týǵa baǵyt alǵanyn bilemiz. Atalǵan salada birqatar jetistikke qol jet­kizdi. О́zbek kompanııa­laryn tyǵyz ynty­maqtastyq ornatyp, osynaý kele­shegi zor salada birlesken jobalardy júzege asyrýǵa shaqyramyz. «Astana Hub» pen «IT Park Uzbekistan» arasyndaǵy yntymaqtastyq osyndaı tabysty sıner­gııaǵa mysal bola alady, – dedi Prezıdent.

Eki el arasyndaǵy mádenı-gýma­nıtarlyq baılanystardyń órisi keńeıe bastady. Bul rette Prezı­dent mádenıet kúnderin ótkizý, shyǵar­mashylyq ıntellıgensııa, jastar arasynda belsendi dıalog qalyptastyrý, kórnekti tulǵalarǵa eskertkish ornatý, sondaı-aq О́zbekstan men Qazaqstan joǵary oqý oryndarynyń fılıaldaryn ashý máse­lelerin qozǵady. Qol jetkizilgen ýaǵdalas­tyqtar qos halyqtyń ıgiligi jolynda san qyrly baılanystardy odan ári tereńdetýge septigin tıgizetinine senim bildirdi.

Al О́zbekstan Prezıdenti Shavkat Mırzııoev ekijaqty yntymaqtastyqty keńeıtýde Joǵary memleketaralyq keńes mańyzdy ról atqaratynyn jetkizdi.

– Bizdiń qarym-qatynasymyz strate­gııalyq seriktestik pen odaqtastyqtyń joǵary deńgeıine kóterildi. Onyń negizinde berik senim, baýyrlas halyqtarymyzdyń arasyndaǵy tatý kórshilik jáne shynaıy dostyq jatyr. Byltyr qurylǵan Joǵary mem­leketaralyq keńes ózektiligi men tıimdiligin kórsetti. Búgin ekinshi otyrysta ózara yqpaldastyqtyń jańa baǵyttaryn jáne zor áleýetimizdiń tyń múmkindigin tanytýdyń joldaryn jan-jaqty talqylaımyz. San qyrly seriktestigimizdi keńeıtýge aıtarlyqtaı serpin beretin sheshimder qabyldaımyz. Qazirgi almaǵaıyp kezeńde elderimizdiń jáne tutas aımaqtyń ekonomıkalyq konıýnktýrasyna oń áser etetin tyǵyz jáne proaktıvti yqpaldastyq erekshe mánge ıe, – dedi Shavkat Mırzııoev.

Sondaı-aq Qasym-Jomart Toqaev pen Shavkat Mırzııoev beınebaılanys arqyly Qazaqstan men О́zbekstannyń birlesken jobalaryn iske qosý rásimine qatysty. Taraptar ónerkásip, qurylys, munaı-gaz hımııasy, qarjy, logıstıka jáne týrızm salalarynda jalpy quny 1,2 mlrd dollar bolatyn 7 joba ázirlegen.

Memleket basshylary sımvolı­kalyq túımeni basyp, birneshe jobany bastap berdi. Atap aıtqanda, Syrdarııa jáne Túrkistan oblystarynda «Ortalyq Azııa» halyqaralyq ónerkásip kooperasııasy ortalyǵy, Tashkentte «Tenge Bank» bas keńsesi qyzmetine kiristi. Tashkent oblysynda kópbeıindi logıs­tıka ortalyǵynyń, Jańa Tashkentte «Astana» turǵyn úı oramynyń jáne «Astana» qonaqúıiniń, Qashqadarııa oblysynda alkılbenzol óndiretin munaı-gaz hımııasy kesheniniń, al elordamyzda «Tashkent» qonaqúıiniń qurylysy bas­taldy.

 

Birlesken málimdeme

Prezıdentter kelissózderdiń jáne Qazaqstan men О́zbekstan Joǵary mem­leket­aralyq keńesi ekinshi otyrysy­nyń qorytyn­dysy boıynsha Birlesken málimdeme qabyldady.

Qasym-Jomart Toqaev pen Shavkat Mırzııoev kelesi qujattarǵa qol qoıdy:

Joǵary memleketaralyq keńestiń Qazaqstan Respýblıkasy men О́zbekstan Respýblıkasy óńirleri basshylarynyń keńesin qurý týraly sheshimi; Joǵary memleketaralyq keńestiń geologııa jáne sırek kezdesetin metaldar óndirý jónindegi jumys tobyn qurý týraly sheshimi; Joǵary memleketaralyq keńestiń transshekaralyq ózenderdiń sý deńgeıin boljaý boıynsha ekijaqty jumys tobyn qurý týraly sheshimi;

Sondaı-aq memleket basshylary­nyń qatysýymen mynadaı úkimetaralyq jáne vedomstvoaralyq qujattardy almasý rásimi ótti:

Qazaqstan Respýblıkasy Úkimeti jáne О́zbekstan Respýblıkasy Úkimeti arasynda Qazaqstan Respýblıkasy men О́zbekstan Respýblıkasynyń azamattyq maqsattaǵy jerústi radıo qyzmetteri paıdalanatyn radıojıilik ıelenimderin shekara mańy aımaqtarynda úılestirý týraly kelisim; Qazaqstan Respýblıkasy Úkimeti men О́zbekstan Respýblıkasy Úkimeti arasyn­daǵy birlesken áskerı oqý-jattyǵý­lar ótkizý týraly kelisim; Qazaqstan Respýblıkasy Úkimeti men О́zbekstan Respýblıkasy Úkimeti arasyndaǵy transshekaralyq sý obektilerin birlesip basqarý jáne paıdalaný týraly kelisim; Qazaqstan Respýblıkasy Úkimeti jáne О́zbekstan Respýblıkasy Úkimeti ara­synda Qazaqstan Respýblıkasy men О́zbekstan Respýblıkasy keden qyzmet­teriniń ókildikterin ashý týraly kelisim; Qazaqstan Respýblıkasy Ádilet mınıstrligi men О́zbekstan Respýblı­kasy Ádilet mınıstrligi arasyndaǵy yntymaqtas­tyqtyń 2026–2027 jyldarǵa arnalǵan baǵdarlamasy; Qazaqstan Respýblıkasy О́nerkásip jáne qurylys mınıstrligi men О́zbekstan Respýblıkasy Taý-ken ónerkásibi jáne geologııa mınıstrligi arasyndaǵy taý-ken ónerkásibi salasyndaǵy yntymaqtastyqty damytý týraly ózara túsinistik jónindegi memorandým; Birlesken ınvestısııalyq platforma qurý týraly negizdemelik kelisim; Qazaqstan Respýblıkasy Den­saý­lyq saqtaý mınıstrligi men О́zbek­stan Respýb­lı­kasy Densaýlyq saqtaý mınıstr­ligi arasyndaǵy «Gamma-pyshaq» stereotaksı­­­kalyq radıohırýrgııalyq emdeý tehno­logııa­syn qoldana otyryp, mamandan­dyryl­ǵan medısınalyq kómek kórsetý salasyn­daǵy yntymaqtastyq týraly memorandým; Qazaqstan Respýblıkasy «Áleýmettik medısınalyq saqtandyrý qory» kommer­sııa­lyq emes aksıonerlik qoǵamy men О́zbekstan Respýblıkasy Memlekettik medısınalyq saqtandyrý qory arasyndaǵy memlekettik jáne mindetti áleýmettik medısınalyq saqtandyrý salasyndaǵy ózara túsinistik pen yntymaqtastyq týraly memorandým; Qazaqstan Respýblıkasy Týrızm jáne sport mınıstrligi Týrızm ındýstrııasy komıteti men О́zbekstan Respýblıkasy Ekologııa, qorshaǵan ortany qorǵaý jáne klımattyń ózgerýi mınıstrligi Týrızm komıteti arasynda týrızm salasyndaǵy yntymaqtastyqtyń 2026–2027 jyldarǵa arnalǵan birlesken is-qımyl jospary; Astana qalasy ákimdigi men Tashkent qalasy hokımııaty arasyndaǵy yntymaqtastyq týraly kelisim; «QazMunaıGaz» UK» AQ men «О́zbekMunaıGaz» AQ arasyndaǵy munaı-gaz hı­­mııasy salasyndaǵy jobalardy bir­lesip iske asyrý týraly negizdemelik kelisim; «QazMunaıGaz» UK» AQ men «О́zbekMunaıGaz» AQ arasyndaǵy «Jarqyn» barlaý jobasy boıynsha qaǵıdattar týraly kelisim; «Assambleıa jastary» respýblı­kalyq qoǵamdyq birlestigi men О́zbekstan Jastar odaǵy arasyndaǵy yntymaqtastyq týraly memorandým.

 

Basty maqsat – qazaq-ózbek qarym-qaty­nas­yn jańa sapaly deńgeıge kóterý

Eki el arasynda jasalǵan kelis­sóz­derdiń mán-maǵynasy, baǵyt-baǵdary Qazaqstan men О́zbekstan prezıdent­­teri­niń BAQ ókilderine arnalǵan brıfınginde aıtyldy.

Memleket basshysy osy saparynyń basty maqsaty baýyrlas halyqtar arasyndaǵy dostyq pen tatý kórshilikti bekemdeý, san qyrly yntymaqtastyqtyń jańa joldaryn ashý, túptep kelgende, qazaq-ózbek qarym-qatynastaryn jańa sapaly deńgeıge kóterý ekenin aıtty.

– Qazaqstan Prezıdenti retinde О́zbekstanmen kópjosparly yntymaqtas­tyqty damytýǵa basymdyq berý mindetim dep sanaımyn. Keıbir sarapshysymaqtar aıtyp júrgendeı, Qazaqstan men О́zbekstan – baqtalas ta, básekeles te emes, kerisinshe, órkendeý jolynda tize qosyp, qatar kele jatqan strategııalyq seriktes, senimdi odaqtas. Halyqtarymyz bir-birin shynaıy qurmet tutatyn jaqyn baýyrlar, dostar, – dedi Prezıdent.

Qasym-Jomart Toqaev Shavkat Mırzııoevtiń ekijaqty qarym-qatynasty jańa sapaly deńgeıge kóterýge jáne álemniń Ortalyq Azııany dostyq pen birliktiń aımaǵy retinde tanýyna úlken úles qosqanyn atap ótti.

– Prezıdent Mırzııoevtiń qýatty basshylyǵymen О́zbekstan kóptegen salada tamasha jetistikterge jetti, dúnıejúzine tabysty damyp kele jatqan el retinde tanyldy. Aýqymdy reformalardyń nátıjesi ornyqty ekonomıkalyq ósimnen, halyqtyń ál-aýqatynyń artýynan, qalalardaǵy qarqyndy ózgeristerden jáne qoǵamnyń barlyq baǵytyndaǵy sapaly damýdan kórinedi. О́zbekstan álemdik arenadaǵy óziniń ornyn nyǵaıtyp, halyqaralyq jáne óńirlik qaýipsizdik pen yntymaqtastyqty qamtamasyz etýge aıtarlyqtaı úles qosty. Qazaqstandyqtar baýyrlas ózbek halqyna shynaıy qoldaý kórsetip, jetistikterine qýanady, – dedi Memleket basshysy.

Sondaı-aq kelissózder barysynda ekijaqty kún tártibiniń keń kólemdi máseleleri talqylanyp, elderimizdiń san qyrly yqpaldastyǵyn odan ári damytýdyń basymdyqtary belgilengen.

– Ortaq maqsatqa qol jetkizýde ekijaqty saýdanyń orny erekshe. Keıin­gi kezeńde eki el arasyndaǵy taýar aınalymynyń jyl saıynǵy kólemi turaqty túrde 4 mıllıard dollardan asa qarjyny quraıdy. Bul – úkimetterimizdiń dáıekti jumysy men bıznestiń tikeleı dıaloginiń nátıjesi. Degenmen saýda-sattyqty arttyrýǵa áli de aıtarlyqtaı áleýet bar, – dedi Prezıdent.

Memleket basshysy ónerkásip, avtokólik shyǵarý, qurylys sektory, energetıka salalarynda keıingi jyldary aıtarlyqtaı tabysqa qol jetkenin atap ótip, taraptar bul baǵyt­taǵy yntymaqtastyqty kezeń-kezeńi­men keńeıtý jumystaryn jalǵas­tyrý­ǵa keliskenine toqtaldy. Aýyl sharýa­shylyǵy salasyndaǵy baılanys­tardy nyǵaıtý basym mindet retinde belgilengenin atap ótti. Bul rette agroónerkásip keshenindegi birqatar joba, sonyń ishinde bıdaı men et-sút ónimderin óńdeý máseleleri pysyqtalyp jatyr. Agrosektordaǵy birlesken jobalarǵa jan-jaqty qoldaý kórsetý kelisilgen. Iskerlik toptar arasyndaǵy baılanystar keńeıedi. Qazaqstanda ózbek kapıtalynyń qatysýymen 6 myńnan asa kásiporyn tabysty jumys isteıdi. Prezıdent osy baǵyttaǵy yntymaqtastyqty arttyrýǵa, ózbek bıznesiniń órken jaıýyna qolaıly jaǵdaı jasaýǵa qazaq eli daıyn ekenin aıtyp ótti. Burynǵy О́ńiraralyq forým О́ńir basshylarynyń keńesi retinde qaıta qurylyp, udaıy qyzmet atqarady.

Kelissózderdiń bir parasy kólik-tranzıt salasyn damytýǵa arnalǵan. Bul oraıda Qasym-Jomart Toqaev Qazaqstan men О́zbekstan aýmaǵy arqyly ótetin júk tasymalynyń kólemi artqanyn atap ótti. Bıylǵy 9 aıdyń qorytyndysy boıynsha eki el arasynda temirjolmen tasymal­ kólemi 15 paıyzdan ósip, 22 mln tonna­dan asty. Prezıdentter aldaǵy ýaqyt­ta da birlese otyryp, tarıf saıa­satyn je­til­dirýge, júk tasymaly sharttaryn jeńil­­detýge, shekaradaǵy ótkizý beket­terin jańǵyrtýǵa jáne keden júıesin sıfr­­­landyrýǵa kelisken. Qasym-Jomart Toqaev bul qadamdar eki el kólik baıla­ny­­syn nyǵaıtatynyna senimdi ekenin jetkizdi.

Energetıka salasynda mańyzdy jobalardy birlesip júzege asyrý boıynsha da aýqymdy jumys atqarylyp jatyr.

– «Reseı – Qazaqstan – О́zbekstan» gaz jobasy tabysty nátıje kórsetti. Kógildir otyndy tasymaldaý kólemin arttyrýǵa qos el nıetti. Budan bólek, munaı men atom ónerkásibi sala­laryn­­daǵy yntymaqtastyqty keńeıtýdiń kele­shegi zor. Tatý kórshilik, ózara qurmet rýhynda jáne bir-birimizdiń múddemiz­di eskere otyryp, sý energetıkasy sala­syn­daǵy áleýetimizdi úılestirý qajet ekenin atap óttik. Bul baǵytta syndarly yntymaqtastyqty jalǵastyrýǵa beıilmiz. Sý salasyna sıfrlyq sheshimderdi engizý­ge, sý resýrstaryn esepke alý men monı­torıngileý júıesin birlese damytýǵa ba­symdyq beremiz. Aqparattyq tehnologııalar men jasandy ıntellekt baǵytyndaǵy yqpaldastyqty kúsheıtýdiń keleshegi mol. Bul rette elderimizdiń derbes jobalary bar. Olardy birlesip damytý búkil Ortalyq Azııaǵa mýltıplıkatıvti áser berer edi, – dedi Qasym-Jomart Toqaev.

Sondaı-aq memleketter arasyn­daǵy ornyqty jáne uzaqmerzimdi qarym-qatynas ornatýdyń kepili retinde mádenı-gýmanıtarlyq baılanystardy tereń­detýge basa mán berildi. Bilim men ǵylym salasyndaǵy birlesken jumys kele­shegi, jastar arasynda qarym-qatynas ornatý máseleleri de talqylan­dy. Bul baǵyt­taǵy aıtarlyqtaı ilgerileý­diń jar­qyn úlgisi retinde byltyr eki el joǵary oqý oryndarynyń fılıaldary ashyldy.

– Biz ýnıversıtetter arasyndaǵy yqpaldastyqty nyǵaıtýdy, akademııa­­lyq almasý baǵdarlamasyn kóbeıtýdi, bir­­les­ken ǵylymı forýmdar men taǵylym­­dama ótkizýdi kózdeımiz. Qazirgi ýaqytta О́zbek­­stannyń baı mádenı-tarıhı mura­lary­­na qazaq týrısteriniń zor qyzyǵý­shy­lyǵy baıqa­lady. Byltyr olardyń sany úsh mıllıonǵa jetti. Bul salanyń áleýetin asha túsý úshin úkimetterimizge birles­ken týrıstik jobalardy damytý jumystaryn jalǵastyrýdy tapsyrdyq, – dedi Memleket basshysy.

Kelissózder barysynda prezıdentter óńirlik jáne jahandyq kún tártibiniń ózekti máseleleri boıynsha ustanymdary ortaq ekenin taǵy da rastaǵan. Ortalyq Azııanyń turaqtylyǵy men qaýipsiz­digin qamtamasyz etýge basa mán berilgen. Prezıdent óńirdiń ornyqty damýy baýyr­las halyqtardyń túpki múddesine saı keletin ortaq maqsaty ekenin atap ótti. Sóz sońynda Memleket basshysy kelissózder qorytyndysyna kóńili tolatynyn jetkizdi.

Al О́zbekstan Prezıdenti kelissózder ekijaqty yqpaldastyqtyń keń kólemdi baǵyttaryn nyǵaıtýda mańyzdy ról atqaratynyn aıtty.

– Qazaqstan Prezıdenti Qasym-Jomart Kemeluly Toqaevtyń bul sapary eki el arasyndaǵy odaqtastyq qaty­nas­­tardyń deńgeıi joǵary ekenin taǵy da rastady. Atalǵan sapar kópjos­parly yntymaqtastyǵymyzdyń jańa tarıhyndaǵy aıtýly oqıǵaǵa aınaldy jáne baılanystarymyzdy arttyrýǵa tyń serpin berdi. Qol jetkizilgen ýaǵdalastyqtar men kelisimder seriktestigimizdi naqty mazmunmen tolyqtyryp, birlesken jobalardyń kókjıegin keńeıtip, baýyrlas eki eldiń damýyna berik negiz qalaıdy, – dedi Shavkat Mırzııoev.

 

Astana – Tashkent – Astana