Túrkistan oblysy Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy. Prezıdent Qasym-Jomart Toqaev qaıǵyly oqıǵaǵa baılanysty marqumdardyń jaqyndaryna kóńil aıtty. Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, atalǵan jaǵdaıdy jan-jaqty tekserýdi tapsyrdy.
Túrkistan oblysy Tótenshe jaǵdaılar departamentiniń «101» pýltine seısenbi kúni tańǵy saǵat 6-ǵa jaqyn Alǵabas aýylyndaǵy eki qabatty jeke turǵyn úıdiń órtengeni týraly habarlama túsken. Oqıǵa ornyna órt sóndirýshiler jetkenge deıin turǵyn úı tolyqtaı órtke oranǵan. Qyzyl jalyn 360 sharshy metrdi sharpyǵan. 5 órt sóndirý tehnıkasy, 16 jeke quram jumyldyrylǵan. Úıdiń ishinen (1 er, 2 áıel, 9 kámeletke tolmaǵan bala), on eki máıit tabyldy. Qutqarýshylardyń aıtýynsha, órtti sóndirý kezinde úıden es-tússiz kúıdegi úsh adam shyǵarylyp, jedel járdem brıgadasyna tapsyrylǵan.
Qaıǵyly oqıǵa bolǵan úı kórshileriniń aıtýynsha, aldyńǵy kúni úı ıeleri súndet toı ótkizgen. Úıde aǵaly-inili, ıaǵnı otaǵasynyń jáne týǵan aǵasynyń otbasy bolǵan. Eki qabatty kirpishten soǵylǵan úı gazben jylytylady. О́rttiń shyǵý sebepteri anyqtalyp jatyr.
Memleket basshysynyń tapsyrmasymen qurylǵan, Premer-mınıstrdiń orynbasary Qanat Bozymbaev tóraǵalyq etetin Úkimettik komıssııa quramyna Tótenshe jaǵdaılar, Ishki ister, Densaýlyq saqtaý, Eńbek jáne halyqty áleýmettik qorǵaý mınıstrlikteriniń, Túrkistan oblysy ákimdiginiń basshylyǵy engizildi. Zardap shekkender men qaza tapqandardyń otbasylaryna barlyq qajetti medısınalyq jáne psıhologııalyq kómek kórsetilip jatyr. Ákimdikke órt saldarynan qaza tapqandardy jerleýdi uıymdastyrýǵa járdemdesý tapsyryldy.
Bala quqyqtary jónindegi ýákil Dınara Zákıeva áleýmettik jelidegi paraqshasynda qaza bolǵandardyń otbasyna kóńil aıtty. «О́ńirlik ýákil psıhologııalyq qoldaý ortalyǵy mamandarymen birge oqıǵa ornyna shyqty. О́rttiń shyǵý sebebi men mán-jaıy tergelip jatyr. Qaza bolǵandardyń týystaryna kóńil aıtamyz», dep jazdy D.Zákıeva.
Jetisaı aýdanynda bolǵan órtke baılanysty óńirdiń medısınalyq qyzmeti zardap shekkenderge jedel túrde kómek kórsetip jatyr. Medısınalyq mekemelerge úsh adam – eki eresek jáne bir bala jetkizilgen. Dárigerlerdiń aıtýynsha, barlyǵy reanımasııa bóliminde jatyr, jaǵdaılary óte aýyr. Olarǵa ıntensıvti terapııanyń tolyq kesheni júrgizilip, jaǵdaıy salalyq mamandardyń baqylaýyna alynǵan.
Jetisaı aýdanynda bolǵan órt oqıǵasy boıynsha sotqa deıingi tergep-tekserý bastaldy. Qazir atalǵan jaǵdaıdyń barlyq mán-jaıyn anyqtaýǵa baǵyttalǵan qajetti is-sharalar júrgizilip jatyr. Tergeý nátıjesimen prosestik sheshim qabyldanatyn bolady.
Túrkistan oblysy