2025 jyldyń qorytyndysy boıynsha qazaqstandyqtar memlekettik qyzmetterdi sıfrlyq formatta óz betinshe alý múmkindigin belsendi paıdalanǵan. Bul týraly «Azamattarǵa arnalǵan úkimet» Memlekettik korporasııasy habarlady, dep jazady Egemen.kz.
Júrgizilgen taldaý nátıjesine sáıkes, ózine-ózi qyzmet kórsetý aımaǵyndaǵy ótinishter sany bir jyl ishinde 6,6 mln-nan astamǵa ósip, shamamen 14,8 mln-ǵa jetken. Al 2024 jyly bul kórsetkish shamamen 8,2 mln bolǵan.
О́zine-ózi qyzmet kórsetý aımaqtary arqyly kórsetilgen qyzmetter sany boıynsha Almaty qalasy kósh bastap tur – munda bir jyl ishinde 2,3 mln-nan astam qyzmet kórsetilgen. Odan keıin tizimde Almaty oblysy (1 mln-nan astam) jáne Túrkistan oblysy (shamamen 1 mln) ornalasqan.
Atalǵan aımaqta eń kóp suranysqa ıe bolǵan kelesi bes qyzmet: elektrondyq sıfrlyq qoltańba (ESQ) alý, arhıvtik anyqtamalar rásimdeý, turǵylyqty jeri boıynsha tirkeý, sottylyǵynyń bar nemese joq ekendigi týraly anyqtama berý, sondaı-aq jyljymaıtyn múliktiń bar nemese joq ekendigi týraly anyqtama alý.
«Bizdiń qyzmetimizdiń negizgi maqsaty – azamattarǵa barynsha yńǵaıly ári qoljetimdi jaǵdaı jasaý. Ár adam memlekettik qyzmetti ózine qolaıly tásilmen alýy tıis: bireýler mobıldi qosymshalar men elektrondyq úkimet portalyn tańdasa, ózgeleri bank qosymshalaryn nemese HQKO-ǵa júginýdi jón kóredi. Biz úshin eń bastysy – qyzmet alýshylardyń jaılylyǵy men qanaǵattaný deńgeıi», dep atap ótti Memlekettik korporasııanyń Basqarma tóraǵasy Arman Kenjeǵalıev.
Aıta keteıik, 2025 jyly HQKO operatorlary arqyly 13 mln-nan astam memlekettik qyzmet kórsetilgen, al 2024 jyly bul kórsetkish 15 mln-nan asqan. Front-ofıster arqyly kórsetilgen memlekettik qyzmetter kólemi boıynsha Almaty, Astana jáne Shymkent qalalary kóshbasshy bolyp qala beredi.
Saýalnama nátıjelerine sáıkes, elimiz boıynsha memlekettik qyzmet kórsetý sapasyna qanaǵattaný deńgeıi 95 paıyzdan asady.