QazUÝ-da iske qosylǵan tórt iri joba

QazUÝ rektory – basqar­ma tór­aǵasy Janseıit Túımebaev Mem­leket basshysyna Inno­va­sııa­lyq ónimder ortalyǵynyń jáne Farabi Hub-tyń joǵary teh­no­logııalyq jobalaryn kórsetti.

Hab ekonomıkanyń naqty sektoryna ınnovasııalyq ázirlemeler engizýdi kózdeıtin zamanaýı platforma retinde qurylǵan. Onyń bazasynda krea­tıvti ındýstrııa, jasandy ıntellekt pen startap jobalary iske asyrylady. Osy arqyly 300 jańa jumys orny ashylyp, 20,55 mln dollar ınvestısııa tartyldy.

Ortalyqta ZTE, BASF, Binlin teh­nologııalyq kor­porasııalarynyń, sondaı-aq bas­qa da sheteldik jetekshi ǵyly­mı uıymdardyń zertteý alań­dary ornalasqan. Buǵan qosa, mun­da QazUÝ-dyń ǵylymı-zert­teý ıns­tıtýttary jumys isteıdi.

Prezıdentke ýnıversıtet jalpy quny 1 mlrd 250 mln teńgeni quraıtyn tórt iri jobany júzege asyryp jatqany jóninde málimet berildi.

Memleket basshysyna Qytaıdyń Soltústik-batys polıtehnıkalyq ýnıversıtetimen birlese ázirlengen mıkrospýtnık maketi kórsetildi. Joǵary oqý oryndarynyń ǵalymdary NKSAT spýtnıgin jasap jatyr. Ol Jerdiń tartylys aýmaǵy men radıasııa deńgeıin ólsheýge, geologııalyq barlaý jumysyn júrgizýge arnalǵan.

Qasym-Jomart Toqaevqa «Qashyqtan zondtaý jáne ony qoldaný tehnologııasy» zerthanasynyń qyzmeti tanys­tyryldy. Bul keshen QHR Ǵylym akademııasymen birlese ashyldy. Zerthanada jasandy jer serikteriniń derekteri negizinde Ortalyq Azııadaǵy klımat jáne ekologııa ózgeristeri zerdelenedi.

Memleket basshysy «Sıfr­lyq tehnologııalar men robotty tehnıka» halyqaralyq ıns­tıtýtyn jáne Robotty tehnıka ortalyǵyn, sondaı-aq Qazaqstan-Sıngapýr kvanttyq tehnologııalar ortalyǵyn aralap kórdi.

Qasym-Jomart Toqaevqa ýnıversıtet bazasynda orna­lasqan sýperkompıýter klas­teri kórsetildi. Ony qurýǵa 23 mln dollar ınvestısııa tartyl­ǵan. Klaster kúrdeli esep­teý­lerdi oryndaý merzimin aıtar­lyqtaı qysqartyp, ǵylymı zertteýlerdiń tıimdiligin arttyrady. Sondaı-aq IT jáne jasandy ıntellekt salasynda maman daıarlaýǵa keńinen jol ashady.