Astana qalasynda «Qazaqstan» teleradıokorporasııasynyń uıymdastyrýymen ulttyq mádenıetti ulyqtaýǵa arnalǵan «Ulttyq kıim» sherýi ótti. «MEGA Silk Way» SO ortalyǵyndaǵy taǵylymdy is-shara Naýryznama onkúndigi aıasyndaǵy Ulttyq kıim kúnine oraı uıymdastyryldy.
Merekelik baǵdarlama ulttyq jáne zamanaýı etnomýzykamen bastalyp, kópshilikke erekshe áser syılady. Konsert barysynda «Saraıshyq» etnoansambli mýzykalyq popýrrı oryndasa, mýltıınstrýmentalıst Edil Qusaıynov etnoáýenderimen keshtiń kórkin asha tústi. Sondaı-aq dástúrli án óneriniń ókilderi Aıgúl Elshibaeva men Jazgúl Dańylbaeva sahnada óner kórsetti.
Sherýge dızaınerler, ánshiler, «Qazaqstan» telearnasynyń tanymal júrgizýshileri Nurbek Bekbaý, Armangúl Toqtamurat, Irına Ten, Beksultan Ákimjan, sondaı-aq «Qazaqstan» teleradıokorporasııasynyń qyzmetkerleri men qala turǵyndary qatysty. Úkili kámshat pen búrmeli kóılek kıgen arýlar, aq kımeshekti ájeler men shapan jamylǵan jigitterden quralǵan 230 adamdyq top saýda ortalyǵyn aralap, halyq ánderin shyrqady.
Elordadaǵy eń úlken saýda oıyn-saýyq ortalyǵynda ótken shara barysynda «Umaı ana» kolleksııasy, «Ádemi-aı», «Jaras» sán klýby, «Quralaı», «Han», «Nazım», «Dástúr», «Asah», «Qazaq ordasy» syndy sán ortalyqtarynyń ulttyq úlgidegi kıimderi kópshilik nazaryna usynyldy.