Qazir qarjy qyzmeti burynǵydan múlde ózgeshe sıpat ala bastady. Bankter men ınvestısııalyq kompanııalar atqaratyn birqatar qyzmetti sıfrlyq platformalar almastyryp, jasandy ıntellekt qarjylyq taldaýdyń jańa quralyna aınaldy. Mundaı úrdisti búginde «fınteh» (fintech) dep ataıdy. Bul ataý aǵylshynnyń financial technology – «qarjylyq tehnologııa» degen sózinen shyqqan. Atalǵan sala qazir tólem júıelerimen ǵana shektelmeı, ınvestısııalaý, bıznes qarjysyn basqarý, kapıtaldy taldaý sekildi baǵyttardy da avtomattandyryp keledi. Máselen, «Finflow», «Paidax», «Investbanq» sııaqty otandyq fınteh startaptar jańa múmkindikter usynyp otyr.
Qarjy platformasy
«Finflow» – shaǵyn jáne orta bızneske arnalǵan jasandy ıntellekt negizindegi qarjy platformasy. Joba kásipkerlerge qarjylyq josparlaýdy jeńildetedi. Kóp jaǵdaıda shaǵyn kompanııalarda tolyqqandy qarjy dırektory bolmaıdy. Al «Finflow» sol qyzmetti sıfrlyq formatta atqarady.
Platforma kásipkerge kompanııanyń qarjysyn taldaýǵa, tabys pen shyǵyndy esepteýge, aqsha aınalymyn boljaýǵa, qarjylyq model qurýǵa kómektesedi. Munyń bárin birneshe mınýt ishinde jasaýǵa bolady. Iаǵnı kásipkerge bólek qarjy mamanyn jaldaýdyń qajeti joq.
«Finflow»-dyń ereksheligi – ol tek esep júrgizýmen shektelmeıdi. Kóp býhgalterlik baǵdarlamalar qarjylyq derekterdi jınaqtaýmen ǵana aınalysady. Al bul platforma derekterdi taldap, bızneske qandaı sheshim qabyldaý tıimdi ekenin de kórsetedi.
Taǵy bir mańyzdy artyqshylyǵy – banktermen ıntegrasııa. Platforma kásipkerge qarjylyq qujattardy tez daıyndap, bankten nesıe alý úderisin jeńildetýge kómektesedi.
Qazir «Finflow» júıesin elimizden bólek, sheteldegi ondaǵan kompanııa paıdalanyp otyr. Startap birneshe otandyq bankpen qanatqaqty jobalardy iske qosyp, shaǵyn jáne orta bızneske arnalǵan sıfrlyq qarjylandyrý sheshimderin ázirlep jatyr.
– Biz «Finflow»-dy qarjylyq josparlaýdy tek iri kompanııalardyń emes, kez kelgen kásipkerdiń qoly jetetin quralǵa aınaldyrý maqsatynda jasap jatyrmyz. Kóptegen shaǵyn jáne orta bıznes qarjysyn júıeli basqara almaı, kassalyq alshaqtyqqa tap bolady, bank qarjylandyrýyna qol jetkize almaı jatady. Sondyqtan biz kásipkerge kúrdeli qarjylyq taldaýdy túsinikti, jyldam ári qoljetimdi etýdi kózdeımiz. Iаǵnı «Finflow» – jaı ǵana esep júrgizetin platforma emes, bızneske durys sheshim qabyldaýǵa kómektesetin sıfrlyq qarjy kómekshisi, – dedi joba jetekshisi Dáýlet Aıtmahanov.
Investısııalyq júıe
«Paidax» – ınvestısııa jasaýǵa arnalǵan mobıldi qosymsha. Paıdalanýshy bul platforma arqyly baǵaly qaǵazdarǵa qarjy quıyp, ózge ınvestorlardyń portfelin de baqylaı alady. Iаǵnı joba ınvestısııany tek mamandarǵa ǵana emes, qarapaıym adamǵa da jaqyndatýdy kózdeıdi.
«Paidax»-ty matematıkalyq modelder men sıfrlyq tehnologııany ushtastyrǵan joba deýge bolady. Onyń negizin qalaýshy Beksultanqoja Ánýarov bul platformany jańa býyn ınvestorlaryna arnalǵan júıe retinde damytyp keledi. Joba tek brokerlik qyzmet kórsetýmen shektelmeı, ınvestısııany túsinikti ári qoljetimdi etýge umtylady.
«Biz Paidax arqyly ınves-tısııany barynsha túsinikti ári qoljetimdi etkimiz keledi. Qarjy naryǵy kóp adamǵa jabyq, kúrdeli júıe sııaqty kórinedi. Al bizdiń maqsat – sol múmkindikterdi qarapaıym qoldanýshyǵa jaqyndatý. Sonymen qatar platformada etıkalyq jáne ıslamdyq qarjy qaǵıdattaryna saı keletin quraldardy damytýǵa mán berip otyrmyz. «Paidax» – jaı ǵana brokerlik qosymsha emes, ınvestısııa mádenıetin qalyptastyrýǵa baǵyttalǵan sıfrlyq alań», dedi joba jetekshisi.
Qazir qosymshaǵa 36 myńǵa jýyq qoldanýshy tirkelgen. Olardyń basym bóligi – 35 pen 55 jas aralyǵyndaǵy ınvestorlar. Platformadaǵy aktıvterdiń jalpy kólemi 10 mıllıon dollarǵa taıap otyr.
Kompanııa aldaǵy ýaqytta jasandy ıntellekt negizinde avtomatty túrde ınvestısııalyq portfel usyný qyzmetin damytpaq. Iаǵnı paıdalanýshy óz múmkindigi men táýekel deńgeıin kórsetse, júıe soǵan saı ınvestısııalyq sheshim usynady. Osylaısha, «Paidax» qarjy tehnologııasyn ınvestısııa mádenıetimen ushtastyrǵan joba retinde tanylyp keledi.
Sıfrlyq joba
«Investbanq» – ınvestısııalyq bankıng pen kapıtaldy basqarýǵa arnalǵan sıfrlyq platforma. Joba kásipkerlerge, iri kapıtal ıelerine jáne qarjy keńesshilerine arnalǵan. Platformanyń basty maqsaty – paıdalanýshylarǵa óz kapıtaly men ınvestısııasyn tıimdi basqarýǵa kómektesetin zamanaýı quraldar usyný.
Júıe jasandy ıntellekt tehnologııalaryn qoldana otyryp jumys isteıdi. Mysaly, platformanyń «AI Analyst» qyzmeti túrli derekkózderden alynǵan jańalyqtar men qarjylyq aqparatty taldap, ınvestısııalyq sheshim qabyldaýǵa kómektesedi. Osy arqyly paıdalanýshylar naryqtaǵy ózgeristerdi jyldam baqylap, óz jobasyn tıimdi basqarady.
«Investbanq» kapıtaldy basqarýǵa keshendi tásil usynady. Platforma aksııalar, oblıgasııalar, balamaly ınvestısııalyq quraldar sııaqty túrli aktıvterdi bir júıede biriktiredi. Iаǵnı paıdalanýshy barlyq ınvestısııasyn bir jerden baqylaı alady.
Platformanyń taǵy bir ereksheligi – jasandy ıntellekt negizindegi ınvestısııalyq portfel qurastyrý júıesi. Ol naryq derekterin taldap, ınvestorǵa ońtaıly strategııa usynady.
Kompanııanyń keńseleri Sıngapýr, Dýbaı jáne Almaty qalalarynda ornalasqan. Mundaı halyqaralyq qurylym «Investbanq»-qa álemdegi iri qarjy naryqtarymen jumys isteýge múmkindik beredi. Platforma Sıngapýrdyń aqsha-kredıt basqarmasy (MAS) sııaqty qatań retteýshi organdardyń talaptaryna sáıkes qyzmet etedi.
Kompanııa ókilderiniń aıtýynsha, olardyń maqsaty – kapıtaldy basqarý salasyn burynǵydan da ashyq ári qoljetimdi etý. Iаǵnı kúrdeli ınvestısııalyq qyzmetterdi tek iri qarjy ınstıtýttaryna ǵana emes, zamanaýı tehnologııa arqyly keń aýdıtorııaǵa usyný.
«Bizdiń maqsat – kapıtaldy basqarý úderisin barynsha ashyq ári túsinikti etý. Investorlar óz qarjysyn basqarý úshin kúrdeli júıelerge táýeldi bolmaýy kerek. Sondyqtan biz jasandy ıntellekt pen sıfrlyq tehnologııalardy paıdalanyp, ınvestısııalyq bankıngti jańa deńgeıge shyǵarýǵa tyrysyp otyrmyz», deıdi joba jetekshisi Oljas Jıenqul.
Sarapshylardyń pikirinshe, fınteh ındýstrııasy aldaǵy jyldary odan ári qarqyn almaq. Jasandy ıntellekt, derekter júıesi jáne sıfrlyq platformalar qarjy qyzmetiniń sıpatyn túbegeıli ózgertti. Elimizdegi «Finflow», «Paidax» jáne «Investbanq» sekildi jobalar osy ózgeristiń jergilikti naryqtaǵy alǵashqy mysaldarynyń biri bolyp otyr.